『及』時行樂 - 樂蜀 Luxor I

第一站 樂蜀熱氣球

泥到樂蜀哩站節目非常緊湊，晨早3點半就 morning call 起身坐熱氣球，導遊話哩個係頭輪，既可以睇到日出，其後去既景點又唔怕晏左去搞到要同人迫喎！咁又係有佢道理既，辛苦D都抵啦！講番坐熱氣球，哩個項目其實係自費活動，本來都唔想玩，事關每人要USD 160，計番港幣折合$1200大元，對我泥講真係好奢侈，但係聽完導遊介紹之後，又好似好得喎，佢話向樂蜀坐熱氣球唔單止係升上天，而係升上天之後真係可以睇到一望無際既風景，一次過遠眺帝皇谷、孟農神像、尼羅河兩岸，當然仲有就係晨光第一線啦！既然咁遠水路泥到，睇怕都唔會再有下次囉，一於豪盡佢啦！

*向尼羅河遊船上左岸，就改坐哩一艘街渡過去西岸，到左岸之後再轉坐van仔去坐熱氣球既地方，天仲未光，現場淨係見到十幾個大氣球，心情相當興奮，每架氣球大約可以坐到二十人左右，為免大家向上面行泥行去搞到唔平衡，個籃仲分成幾個小格，每格企4個人唔使爭，機師亦係由英國受訓番泥佢講，一開始先同我地講解升降情況，同埋一D基本常識，之後就馬上升空，全程大約1小時，上面既風景的確同導遊介紹既一樣，詳盡可見下圖，真係值回票價架！

*發現農民住既都係無頂屋，唔知係咪熱呢，見佢地瞓晒向天台既，只係好簡單咁用D乾草舖向地下加張被就瞓，男女老幼都係咁，當然我地經過會噪醒佢地啦，有D都鬧鬼我地架，不過有好多都見怪不怪喇，仲起身同我地揮手添，仲見有D向到烤緊餅，叫我地落去食呀！好搞笑！

*今日恆指跌破萬五點，個個都一臉灰，其實比起哩班農民，我地已經活係人間天堂喇！睇開D放鬆D啦！反正後悔都太遲啦！

上一篇：『及』時行樂 - 亞斯旺 Aswan II

下一篇：『及』時行樂 - 尼羅河遊蹤 Nile River Cruise

『及』時行樂 - 亞斯旺 Aswan II

除左Abu Simbel之外，沿路仲參觀左有好幾個神廟，發現古埃及人好鍾意將D動物神像化，非常有趣！

第二站 Kom Ombo Temple 鱷魚神廟 (25 L.E ~HK$30)

哩間廟係供奉鱷魚神 Sobek & Harqeris，裡面真係有條鱷魚木乃伊架(又係唔俾影相)，不過就冇埃及博物館個條咁大條囉！都唔明埃及人點解乜都包得一餐既！

* 咪以為神像渣住既係奶咀呀，而係古埃及常見既法器叫Key of Life生命之匙！

*叫得做鱷魚神廟又點少得鱷魚壁畫呢！

第三站 Edfu Temple 鷹神廟 (40 L.E ~HK$50)

哩座神廟保存得幾好架，入面仲有兩隻鷹既神像，個樣都幾卡通，仲帶左頂帽非常可愛！整座神廟裡裡外外石柱牆壁既壁畫仍然清晰可見，上至天神故事下至婦女生育都有詳盡刻劃，係見證古埃及文明既一本歷史書！好值得參觀！

* 哩幾座石柱係咪有D希臘神殿 Feel 呢，聽講哩座廟起左好耐，最後係向羅馬年代時起好架喎！柱頂花型既裝飾係蓮花化表上埃及，下埃及既代表植物係蘆葦。

* 旅行社特別安排我地座馬車去哩座神廟，路程其實好短，唔使10分鐘，哩隻馬係最fit架喇，大部份都係皮黃骨瘦，好可憐架，試想想成50度高溫仲要跑泥跑去，我地坐既都覺得辛苦啦，可況騎馬人同隻馬仔呢！雖然話旅行社已經俾左錢，但係我估唔方多囉，如果可以既話俾多一兩蚊埃及鎊個馬伕都冇所謂啦！計番港紙都係2-3蚊之麻！

上一篇：『及』時行樂 - 阿歷山大港 Alexandria

下一篇：『及』時行樂 - 樂蜀 Luxor I

『及』時行樂 - 阿歷山大港 Alexandria

去亞斯旺之前，我地先去阿歷山大港兜左一轉，其實哩到冇乜野好睇，叫做睇到地中海咁囉。

第一站 法老王燈塔遺址

*冇得入去參觀，淨係向出面影下相咋！確實都好無聊囉！

第二站 Cata Comb 羅馬地下墓 (25L.E ~HK$30)

*聽講有隻騾仔唔小心跌左落去個坑到，佢個主人救佢時發現此古墓喎！入面唔俾影相架，事關又係流流的，有個小水井有排旋轉石梯，下面有好多一格格既洞穴咁囉，仲有一個小墓室既，入面既壁畫仲算幾清晰架，石像保存都OK，不過副棺材同木乃伊就已經運走左喇，冇得睇！

第三站 Summer Royal Palace 蒙塔扎夏宮

* 皇宮當然冇得入去睇啦，個花園都可以落去行下，近海邊仲有個廢墟物體取景拍照落念既！

第四站 Pompay Pilar 波比石柱

*雖則話哩條柱有成千幾年歷史，但仍然當選為無厘頭景點一號，又唔入得去，只可以隔住鐵閘裝裝下！都唔知想點！

第五站 阿歷山大圖書館

* 無聊景點之二，竟然停車隔住條大馬路影過去，好在附近有隻牛既雕塑陪襯下，咁先無咁寡咋！

上一篇：『及』時行樂 - 亞斯旺 Aswan I

下一篇：『及』時行樂 - 亞斯旺 Aswan II

『及』時行樂 - 亞斯旺 Aswan I

亞斯旺係埃及must have既行程，因為哩到有一個好著名既神廟Abu Simbel 阿布辛貝神廟，同埋從哩到開始坐觀光遊船沿尼羅河遊玩，沿河風光明媚係埃及發源地，同時亦見證住埃及曆代法老既興衰！

第一站 Abu Simbel 阿布辛貝神廟

導遊話參觀哩座神廟，因為要配合軍警開路所以分左3個時段，一係清晨五點，二係中午11點，三係下午三點，佢再話因為而家係9月中天氣仲好熱，三點會熱死，所以只可選一或二，二咁大路人一定好多，加上而家咁熱去到會見到遮頭湧湧影相唔方便，所以建議大家簡頭輪喎！佢咁講法我地仲邊有異議呢！講番轉頭哩個景點係必須參與既自費活動泥，其實我都唔明點解唔加埋入基本行程到要改成自費囉，反正都要求所有人一齊去既，好過去阿歷山大港多多聲啦。哩項自費活動唔平架，位位盛惠HK$1190，事實上又真係好值得去既，事關座神廟真係好偉大，完全唔明白點解4千年前D人會起到咁大規模既建築物，雕刻既手工又可以好到哩個地步，反觀我地中國4千年前仲係剛剛起步，仲過緊D好原始既生活咋，點解世界既另一面可以咁先進呢，又話係進化既，點解有D人可以行得咁前既呢！？哩個真係千古謎團！亞斯旺以前年年受尼羅河氾濫既苦，所以幾十年前埃及政府藉聯合國幫助興建水壩，不過哩項工程對沿河既好多神廟都有影響，哩座阿布辛貝神廟亦會被淹沒，好在最後都成功將哩座神廟拆解再原地升高200呎，絕對係另一項世紀工程！

*壁畫所示法老得到神明既庇佑下，連連勝仗。

*壁畫所示正係當年一批批非洲戰俘既情景。

哩座阿布辛貝神廟係當年法老王 拉美西斯二世(Ramesses II) 所興建，所以入口處離遠就已經睇到一排四尊拉美西斯二世既巨大座像，古代人思想單純，掌權者往往將自己推舉成神明既化身，令眾人民對佢又敬又畏，從神廟既壁畫顯示，哩座神廟係當年拉美西斯二世南征北伐，從歐洲非洲等地帶來一批又一批既戰俘所建成，非常厲害！

* 右起太陽神(Re-Horakhti)、拉美西斯二世、阿蒙神(Amun-Re)，陰間之神(Ptah)，聽講每年春秋二分，有一日太陽會照遍整座廟，只有陰間之神既座像照唔到喎！唔止係七大奇景，簡直係七不思異事件呀！

向隔離仲有一座神廟Temple of Hathor，係拉美西斯二世為其愛妃Nefertari而起，老實講法老王既老婆又點止佢一個呢，但只有佢先可以同法老王平起平坐，莫講話起座廟個佢啦，其他個D冇咁愛既起個像已經好巴閉，但都只會係迷你版放向法老王石像對腳旁邊架咋，哩個 Nefertari聽聞係mix泥所以特別靚，特別得法老歡心，佢仲將哩位愛妃化身為愛神，哩D咪叫萬千寵愛在一身囉！

*Nefertari皇后梳哩個奧咪架頭係代表住皇后係愛神化身喎。

*睇下其他妃嬪既做像既咁mini

上一篇：『及』時行樂 - 開羅 Cairo II

下一篇：『及』時行樂 - 阿歷山大港 Alexandria

『及』時行樂 - 開羅 Cairo II

第四站 Egyptian Museum 埃及博物館(50L.E ~HK$60)
埃及博物館建於一百年前，由一名英國人策劃興建，內藏各式各樣各年代法老既珍貴文物，由木乃伊到神廟石柱神像，到近代出土既法老王圖坦卡蒙純金面具棺槨陪葬品到4千年前既種子麵包衫褲鞋物乜都有得睇，但可惜唔俾影相囉。不過正如導友所講，埃及人太不思進取喇，展館內既一切如同一百年前時既模樣，有D展箱既玻璃爛左又唔補番，最名貴既珍品最多都係用個鎖仔加幾條鐵線扎實，哩到既展品話就話有名牌，但係冇人會睇得明架囉，D英文都唔知佢寫乜，又冇簡介，30年前已經收藏入館既文物，竟然仲係用緊張爛鬼單行紙手寫幾句標籤咋！唉，簡值離晒大譜！心諗反而俾人偷左去收向大英個批仲好D，起碼有專人照顧，冇咁易賤，應該可以保存耐D囉！放向哩到冇人泥偷，過多幾年都自己風化囉！

第四站 Khan El Khalili Market 加奈加里里大市集

係開羅最大既市集，不過近年已變成遊客區，就好似赤枉一樣，賣既都係紀念品手信之類，做得遊客生意既價錢就當然唔會最平啦，不過俾幾多錢都要靠你自己一張咀喇！技巧同向大陸買野差唔多啦，不過哩到D人好似就笑容好D客氣D，大陸有時你講完一餐唔買既話，會俾人破口大罵架麻！當地人最叻就係講one Dollar即係一蚊美金， 一於有理冇理是旦噏引左你埋去先算！個人心得，如果你想買D木雕神像，中東頭巾cheap cheap小手信既，大可以幫襯遇途景點隨街兜售既小販囉，平過向哩個市集買好多架！或者向亞斯旺個邊個市集買囉，都係平D架！手信方面大家可以考慮入香水樽、木器雕像、中東頭巾、銀器飾物、香料之類，食物就千祈咪買喇，好多烏蠅嬲又唔蓋好，一睇就知食左會肚痛個隻囉！如果想試下埃及咖啡嘆下水煙既話，哩到應該有好多選擇既！

上一篇：『及』時行樂 - 開羅 Cairo I

下一篇：『及』時行樂 - 亞斯旺 Aswan I

『及』時行樂 - 開羅 Cairo I

暑假時無記熱播向世界恤髮III，晚晚睇完搞到我都好想去恤番個髮，結果同朋友A結伴再踏上旅途，今次既目的地正是埃及。埃及金字塔被選為世界七大奇景之一，自不然成為世人向往既旅遊勝地，但對於東方人泥講，位於北非既埃及仍然好陌生，對埃及歷史就更加一無所知啦！如果自由行既話，真係需要好認真咁搜集多D背景資料，如果唔係去到齋睇肯定好無聊！由於時間既關係，今次我決定跟團做番隻鴨仔，跟導遊姐姐行一次埃及，聽下佢講故仔就算喇！哩個係十日既雙飛團，途經開羅、阿歷山大港、亞斯旺、樂蜀、洪加達，尾站停杜拜，當中開羅去亞斯旺同埋由洪加達返開羅兩程都係坐內陸機慳番唔少時間。今年9月係佢地既齋戒月，傳統上要等到日落後先可以進食，日頭個陣就連水都唔可以飲，當然埃及有一成係基督徒再加上旅遊業，所以一樣有餐廳照常營業既，我地跟團就更加唔會有影響啦！進入埃及第一個城市就係Cairo 開羅，係埃及主要觀光景區，事關幾乎所有金字塔(Pyramids)都向晒哩到。
第一站 Saqqara 梯形金字塔
Saqqara梯形金字塔(50 L.E/ 成人 ~HK$60)，係最古老既金字塔，哩座法老皇陵雖則有成4千幾年歷史但係墓入面既壁畫仍然清晰可見，非常厲害。

第二站 Giza Pyramid 金字塔

一次過見勻三大金字塔，不過如果想入大塔即係古夫王個墓(Pyramid of Khufu )參觀就難D喇，事關每日限派兩次籌，早上8點派150個(夏)250(冬)，下午1點又派一次，要入去就要再預早2個鐘向門口排隊， 不過據講一同二(Pyramid of Khafre)入面都係差唔多，身水身汗扒入去，發現裡面原來係吉既，就連一幅壁畫都冇囉，唔怪得唔俾人影相啦，就係廢事以後冇人入去搵少左囉！今次我地入左二號塔(25L.E ~HK$30)，個入口好細，但係勁多遊客，原本已經只係一條只得3呎乘3呎高x闊既隧道，加上條路好斜非常難行，一唔小心就撞到頭，加上入面空氣好混濁好難聞，今次全靠朋友個支旁身藥油咋，此時此刻果真聞一聞醒腦又提神！外面氣溫四十幾度，入面就更熱更焗，行到半路就已經全身濕晒，好似焗Sauna一樣！

* 跟團有個好處，就係夠雞精，導遊幫我地搵埋最佳影相位，專登車我地去可以一次過影齊三大金字塔既地方，問你服未！左面第一個係阿爸古夫王既墓，隔離係阿仔Khafre，最右係阿仔個仔Menkaure。

*金字塔四圍都係靚景，想點影就點影！

* 上面哩個有帽既就係二號金字塔(Pyramid of Khafre)，原本全座塔都好似上面咁光滑架，可惜幾十年前試過地震，面頭既靚石倒塌，仲俾人偷晒去起屋，搞到而家咁凹凹凸凸之麻！

* 下面0個個係原本古夫王陵墓既入口，下面細細0個個係盜墓者鑿出泥既，由於唔想破壞原貌，而家入內參觀反而用哩個門口喎！希望各遊客唔好真係當正自己係盜墓者羅拉咁就得喇！

第三站 Sphinx 獅身人面像(50L.E ~HK$60)

睇得電視多，今次終於有幸親眼見到哩個有五千年歷史既建築物喇！以前聽人講話好細，都唔係呀，我覺得都好大座喎，同匯豐門口個隻比，最少大1000倍啦！足足有半個標準池咁大喎！仲要係由一大舊原石雕出泥架，5千年前喎，認真唔簡單呀！聽導遊講，由於古埃及相信人既靈魂會向死後透過鼻孔入番體內已復活，所以好多法老皇既石像都俾人打爆晒個鼻，就係唔想佢地復活咁話喎，邊個做既？當然係佢地D死對頭啦！

下一篇：『及』時行樂 - 開羅 Cairo II