春日櫻紅大會 - 名古屋 Nagoya

離開下呂我地揀坐下呂溫泉直行バス落名古屋車費2100円，必須透過下呂溫泉旅館預約，為免有乜閃失，出發前以電郵搵左酒店幫忙訂位，咁就萬無一失啦！車站向正下呂駅對面，非常方便。當然你亦可以選擇坐JR東海線啦！開往名古屋既路上沿途風景其實都好靚，拍得住嵯峨野小火車一段既景色，粉嫩櫻花翠綠樹林碧綠色既河水山流，相信秋天泥必定會更靚，當然自駕遊就更好啦。

經過差不多兩小時既車程，終於抵達名古屋，沿路已見到滿城櫻花，可惜天公不做美，天陰陰咁，所以決定維持原判，爭取時間買手信！

* Oasis 21 商場

* LACHI 商場賞櫻

*鯨魚肉問你怕未！

向JR名古屋駅落車後，當然先去酒店check-in啦，之前向網上一早訂好Wing’s international hotel 4500円/人，同JR名古屋駅只差一個站，好方便。名古屋既shopping地點都好近，主要向榮商業區，高島屋三越松板屋LACHI戶戶相連，0岩晒我地哩D一天遊掃貨水客，哈哈。其實個人對行街購物向來麻麻，不過都要配合下其他團友既需要啦，雖然今日行程咁緊湊，我都為自己搵左個最後景點就係幫襯哩間『矢場とん』，食番客招牌菜味噌汁炸豬扒，講說係名古屋名物喎，講到咁堅當梗要試下啦，原來名物有時都係靠唔住，同『名代かつくら』實在差太遠，又貴，好在今日唔使排長龍，否則白白浪費保貴既旅遊時光就唔抵啦！

~ 終 ~

上一篇：春日櫻紅大會 - 下呂溫泉 Gero

春日櫻紅大會 - 下呂溫泉 Gero

接住白川鄉下一站我地既目的地，正係日本三大名湯之一既下呂溫泉，從高山濃飛站坐巴士車費只係1010円，不過就要坐成兩個鐘(普通巴士無需預約)，基本上泥下呂除左浸溫泉之外，都冇其他節目，一條下呂大橋貫通兩岸，下呂川落緊既正係從奧飛騨既泉水，河床雖淺但非常清澈，河岸旁竟然仲有一個公眾露天風呂，嘩，使唔使咁open呀！咪以為冇人浸呀，離遠睇真係有兩個大叔天體浴架！

 *留意圍欄~

*下呂大橋沿路印有好多小朋友既手印

日本人除左邊嘗雪邊浸溫泉之外，花見溫泉亦非常人氣，估唔到泥到下呂櫻花已經滿開，雖然沒有藍天，但此行已是大滿足了！

下呂溫泉旅館多的是，睇過菜欄介紹過一泊兩食，今此有機會梗係又要試下啦，經樂天千挑百選，最後揀左哩間小川屋溫泉酒店，今晚唔再住民宿，一於豪少少住番間似樣既酒店先得，小川屋沿河而建仲有露天風呂，晚餐仲有飛騨和牛會席料理，每人12600円/晚，相比其他溫泉旅館哩到算好實惠架喇！

*小川屋

*大堂

*房間

*淨係哩客飛騨和牛壽司，香港賣都要HK$100粒啦！

*飛騨和牛Shabu Shabu

*鹽燒岩魚

*仲有好多餸未齊架！

*咁豐富既晚餐實在太感動喇，齋睇餐牌已經感受到總廚既心思啦！

*下呂哩個地方，景點就真係冇，沿街散步總會遇到免費既足湯同手湯！作為短線遊都係唔錯既選擇！

*偷得浮生半日閒

*好爽哦！

上一篇：春日櫻紅大會 - 白川鄉 Shirakawago

下一篇：春日櫻紅大會 - 名古屋 Nagoya

春日櫻紅大會 - 白川鄉 Shirakawago

今日既主要景點就係期待以久既白川鄉，尋日已經向高山駅濃飛巴士站買好左今日一日遊既車票4500円包埋合掌造り民家園入園券，自由選揀登車時間，一日遊當然有咁早得咁早啦，不過唔係班班車都可以預約架，要搭晨早8:50班車就一定要早D到，今朝我地已經一早起身，不過要食埋個飛騨和牛早飯，又要去行埋高山朝市，好明顯我地就早唔到啦，去到已經見一條人龍，話咁快就坐滿人，心諗唔通要等一個鐘等下班車！？說時遲那時快，見站長數數人頭，指左一輪，就見有另一架巴士駛埋泥，嘩，太好彩啦，原站長見仲有咁多人，所以安排多班車，09:00正式開車！

從高山去白川鄉車程約1小時，實在好興奮去到發現仲未溶晒雪喎，我地既策略就係先上天守閣展望台影相，爭取時間當然唔會行上去啦，第一件事去搵專線小巴200円，每小時約4班，我地算係第一批人上去，人唔多唔使迫，正！

*哩幅係經過仿移軸鏡處理過既，係咪好得意呢！？

之前睇相見D合掌屋以為好細間，其實都唔細架，有D起到好大，好有原始風味，唔知點解梗係覺得有D似貴州個D村寨既。其實合掌屋都唔係白川鄉獨有，奧飛騨，高山附近都有好多，不過就以白川鄉哩條村最密集同最原汁原味，雖然話日日都有成千上萬旅客到坊，但其實仲有好多人仲向哩到生活，有D屋就做左民宿，不過仲有唔少農民以種稻米為生架，差唔多間間屋前都有一塊稻田，相信秋天泥可能會更靚，既可欣賞紅葉又可欣賞到秋收時昏既金黃稻田添！

*遠望d殘雪都幾靚

*近睇黑炆炆囉

*春回大地

車票包埋既合掌造り民家園，其實係將好幾間合掌屋加以修復後，再作對外開放既示範單位，車票包埋當然值得參觀啦，反正單買來回車飛都要4300円，俾多200円仲唔抵睇呀！其實個人覺得白川鄉行3-4個鐘已經好足夠，除非你好鍾意影相，要影均日出日落之類啦，否則唔使向到過夜囉！

*飛驒和牛咁出名，又點可以齋食肉呢，哈哈，一於試埋飛騨和牛奶先，嘩，唔講唔知呀，香港買到既北海道牛奶咪寫住乳脂濃度係3.6既，哩包野竟然係5.2呀！嘩，唔怪得超濃奶味啦，好在細細包咋，唔係飲多幾包實變埋肥牛都得囉！呵呵

上一篇：春日櫻紅大會 - 高山 Takayama

下一篇：春日櫻紅大會 - 下呂溫泉 Gero

春日櫻紅大會 - 高山 Takayama

前後7天關西行程終於告一段落，下一站先係今次旅程既重點，之前向網上一早已經訂好長途巴士飛，大阪高山直行(京都上車)單程票價盛惠3000円，比搭JR實在平成半有多，認真慳唔少，不過聽講只限夏春秋，冬天暫停服務。以前都搭唔少長途巴士，今次向日本搭感覺好唔同，服務好到不得了，每隔一小時停車10分鐘俾大家方便下，中途站既厠所非常乾淨衛生，各式售賣機熟食店手信店真係一應俱全，尚當有效率。最緊要都係準時到位，唔遲唔早時間0岩0岩好！

巴士唔會停高山駅，已係向三大酒店落客，首先係高山櫻庵，亦係最近高山駅既落車處，落左車，話咁快就搵到我地間旅館『清兵衛』。揀哩間旅館純粹係因為佢平靚正Comment好，地點近JR站， 5250円/位包朝食仲係朴葉味噌燒飛騨和牛，哩間小旅館地方雖少，但係五臟俱全，乾淨衛生絕無港客非常日本風，包租婆仲好nice添，值得推介！

接住落泥哩幾日行程都好緊湊，要日日換酒店，首要任務係先去搞掂所有車飛先，往來高山/白川鄉/奧飛騨一帶既客運服務叫濃飛巴士公司，車站向正JR高山駅隔離，易搵之餘仲有大型locker提供超方便。

春天泥高山，景色當然冇冬天咁淒美啦，不過都幾古色古香，特別係上二之町至下三之町個幾條小街，完全復刻版，相比雲南麗江大研古城 / 速河古鎮，大家都係國家級歷史名勝，點解效果可以咁唔同，好明顯就係當地政府跟本就係本末倒置，淨係諗點樣可以吸引更多遊客，搵更多錢，將保育理念完全放埋一邊，所以咪搞到而家成個大研古城都開滿酒吧disco囉，永久地嚴重破壞當地文化同民風！唔該反醒下啦！

*高山陣屋

*宮川朝市

*高山陣屋前朝市

*中橋

*櫻山八幡宮

*Sarubobo 飛騨寶寶 - 吉祥物

*高山祭"惠比壽"轎準備中

高山地靈人傑，亦係飛騨和牛既產地，我地當然唔會放過一嘗美食既機會啦，之前向網上搜集過資料，哩到最出名既有天狗 同 丸明，不過我就覺得一場泥到不如試下地道d既菜式啦，所以揀左間老食店『京や』，裡面裝修非常傳統，仲有備長炭即燒即食，好有特色咁喎！我地一行四人最後點左兩款套餐，一次過試勻多款和牛菜式，味道更加係ICHIBAN啦！炭燒飛騨和牛簡直就係入口即溶，咪睇少哩個牛肉飯呀，d牛肉又林又滑加上高山產米飯，實在回味無窮！OISHII呢！

上一篇：春日櫻紅大會 - 嵐山嵯峨野 Sagano
下一篇：春日櫻紅大會 - 白川鄉 Shirakawago