有種...旅行: 3月 2010

2010年3月30日星期二

春日櫻紅大會 - 京都 Kyoto I

坐JR由大阪去京都車程唔使一個鐘，車費都只係540円，向京都玩坐巴士就最方便，所以泥緊哩三日都會用京都市內巴士一日券500円，住近京都駅就更方便，事關駅口有齊你所需既巴士，日間最多旅客坐既係洛100，運行所有京都主要景點，人龍最長好在班次都好密，等左15分鐘就上到車，通常第一站全世界都會向清水寺前落車，哈哈我地早一個站向五条落，沿五条坂上清水寺。清水寺座落於小山丘之上，向前望可以見到京都塔，如果泥睇夜櫻或者紅葉，應該可以順便欣賞埋京都夜景先走囉！

清水寺隔離有座地主神社，係著名既求恩緣既寺廟，放兩舊戀愛石，就已經吸引到每日成千上萬既遊客參拜，認真唔講得笑，可惜此行團友太多，唔可以咁揚，唯有再等下添啦！哈哈哈

*唔通佢係玉兔？！

離開清水寺，再順清水坂三年坂二年坂一直行，沿路遊人超多，原本都諗住租和服著下既，但係諗諗下都係覺得著住和服又唔方便影相又唔方便行石級，又廢事要其他團友等，所以都係冇租啦！假如你好有表演慾又鍾意被人影相既話，就一定要租泥著喇，事關好多遊客唔理你係中國人定日本人都會走埋泥話要同你影相囉，我都捉左幾個日本人一齊影合照啦，哈哈，係呀我肯定佢地係日本人先會搵佢地影合照架，影番d香港人就冇意思啦！除左著普通和服外，仲有好多女仔會俾錢扮藝妓架，其實都好費解，點解好扮唔扮都扮藝妓呢，十個有十個都好嚇人架喎！同埋最好唔好要求同佢地企定定合照添呀，驚嚇程度簡直爆燈囉！

*影Snapshot咪幾好囉！

*哩位最靚，仲有8分似鄧麗君呀！

沿路一直行，好快就到円山公園，京都既櫻花大部份已經滿開，相比大阪，感覺京都既古雅配櫻花更加靚更優雅。京都一踏入4月已經進入花見期間，大部份既賞櫻名所，都會搞賞花大會，樹底下舖張墊就可以齊齊Happy Hour，円山公園內更有好多小食檔賣各類傳統日式小食，氣氛超好。

離開円山公園就到八阪神社，拜既野都大同小異，除左一般既學業恩緣健康事業之外，竟然連美白美容都有得求，可見從古到今都係女性比較迷信。神社四圍都掛滿燈籠，睇真D原來全部都係京都祗園區一帶著名餐飲名店，仲以為係甚麼祝福語，實情係廣告燈箱至真！

*此泉為美容水，可能勁過SKII噃！

離開八阪神社，望出去就係非常繁榮既祗園區，向前行好快就搵到花見小路，聽聞花見小路係以前風月場所，適逢此時夜幕低垂，氣氛絕襯！當然而家既花見小路，都只係食店為主，不過都仲有藝妓表演既高級日本料理店，所以偶然都會見到一個半個真正藝妓路過架！

*哩張影后相我最喜歡！

今天晚餐選定位於京都駅既炸豬扒名店『名代かつくら』，真係超好味，白飯味噌湯沙律絲都係任添任食，豬扒炸得甘香鬆脆，醬汁酸甜度又適中，水準遠勝香港任何一間日式炸豬扒店囉！

上一篇：春日櫻紅大會 - 姬路城/ 奈良 Nara

下一篇：春日櫻紅大會 - 京都 Kyoto II

春日櫻紅大會 - 姬路城/奈良 Nara

姬路城被例入世界歷史遺產，當然想去睇下啦，由大阪出發坐JR車費要成3000円，所以好多人會揀用關西通行証，但係唔坐得JR，車程超過兩小時，計泥計去都係買JR West Pass一日券2000円最抵，由大阪駅出發唔使轉車一個鐘直達，都ok方便既。基本上一出姬路城車站，離遠已經見到座城，一直前行就搵到，城外庭園種滿櫻花，不過我地泥早一步，櫻花只開得10%，如果遲多個星期離實會好震撼啦！

雖然我地9點未夠已經到，但係遊人已不少，經過一二三四門都有少人龍，最後入到大殿就要除鞋，哈哈…我一早提就各位今日唔好著穿隆襪架喇！當日天氣好凍，除左對鞋行木板地真係凍到入心入肺，最無奈係發現大殿入面跟本冇乜野好睇囉，只係人迫人咁快速行完幾層樓，都幾無聊下。不過就咁樣行都搞左成三個鐘，離開時12點，竟然見到一條長長人龍，由城牆排到入花園，起碼幾百人，都唔知好彩定唔好彩，如果朝早又係咁多人就唔會sign時間排隊入去啦，咁就可以早去奈良囉！

去奈良純粹為左睇鹿仔，當然奈良係日本歷朝古都，應該有D特色掛，反正買左JR West Pass梗係要用盡佢啦！向奈良JR站前再轉觀光線巴士#1 或 #2 就可以直達奈良公園、春日大社、東大寺等所有景點，就算唔識路見到鹿仔就知自己已經進入奈良公園景區範圍，不過當日所見到既鹿仔，似群野狗多D囉，不但見唔到梅花點，仲好似有皮膚病咁喎！都唔知係咪D遊客亂咁餵鹿仔食埋D人食既野啦，真係陰公呀！現場所見哩班唔似鹿，似餓狗多D囉，老實講唔係咁可愛架咋，見埋佢地搶食個樣仲覺有D可怕添喎！