有種...旅行: 2010

2010年7月7日星期三

俄羅斯狂熱 - Other Delicacies

叫做食過幾餐既俄羅斯菜，終於死心，決定食番意粉薄餅甚至Kebab穩陣D！差D唔記得講熱狗車添，哩個牌子既熱狗車係連繫既，周圍都有，當午餐一流！

意大利菜都有平既中價既選擇，平既有(Сбарро) sbarro 連繫快餐店，飯堂式運作食乜夾乜，按重量計錢，公平免浪費，每餐約250 rouble。味道靠得住！位於Red Square哩間分店，想借厠所唔該幫襯買D野先，憑收據按密碼開門。

另一間中價既意大利餐廳叫 MaMa Roma，又係連繫式經營，有人招呼架，價錢都合理，每人每餐約350 rouble。

各位如果想飲咖啡架喎，就要認住哩個俄文(KO中E)或者(Ka中E)即解作Cafe！飲咖啡就去搵(中E)喇！

Yaroslavlsky 火車站外特別熱鬧，有好多餐廳同小食店，學我地咁買番個Kebab上火車開餐，既省時又美味！每個都係80 rouble左右咋！

如果打算去Vernisazh Market既話，就要食番串燒羊扒配大餅先得喇，個人認為係新彊風味亦有可能係土耳其，好味惹味正！食左咁多餐俄菜，今餐最醒神！

~ 最終回 ~

上一篇：俄羅斯狂熱 - Russia Cuisine

2010年7月6日星期二

俄羅斯菜最出名都莫過於羅宋湯啦，不過聽聞同香港茶記既紅湯分別好大，味道亦冇咁正，當然口味既野人人唔同，不過一場泥到又點可以唔試真D呢，就算十個難食都要試下啦，唔係返到香港點可以大大聲聲同人講『嘩！正宗羅宋湯原來好難飲架！』先，哈哈！平時去旅行我都會事先上網搵定D當地必食既餐廳或者菜式，今次都唔例外，其中一間位於紅場附近叫Godunov 主打俄羅斯菜，室內裝修的確好有特色，不過晚上8點到達竟然人影都冇個，開始有D擔心，睇睇餐牌原來真係好遊客，菜式干均要成HKD 200-300一客，今日我地一行五人居然cheap 到只叫三道菜，哈哈真失禮！(地址：5 Teatralnaya pl., bldg.1 National Museum 右行1分鐘)

魚子醬Pancake向俄羅斯菜中係計羅宋湯後另一必食既菜式，分黑色既鱘魚子或者係紅色既三文魚子，我地咁cheap當然係食三文魚子啦。哩味菜式向俄羅斯叫Blini，一片薄餅加魚子加sour cream，味道鹹鹹地腥腥地酸酸地，總知好食有限啦！魚子應該係醃製過既，加上又唔係乜野貴價貨色，所以絕冇爆爆脆口感，個人比較喜歡食日式三文魚子多D囉！

原來俄羅斯人都鍾意食內臟架，唔小心點錯炒雞雜，味道唔差蘋果醬味，個人就食唔慣淨雞雜既質感！

聽聞俄羅斯餃子都係傳統菜之一，今日點左客羊肉餃，當地習慣加D酸梅醬同sour cream一齊食。我就話落餃子醋會襯D喇！

每個地方既菜式有貴既亦有平既選擇，哩間連繫快餐 My‧My，可以叫做俄羅斯大家樂，飯堂格局，價錢算叫合理，每餐每人約250 rouble。

哩碗就係傳聞中既羅宋湯 Borsch，偏紅應該加左唔少紅菜頭，飲前按個人喜好落 Sour cream，味道唔太濃亦冇其他網友講得咁鹹，尚可一試。

其他食品，真係只可以話填飽肚就算，唔好再問好唔好食啦喇！(只可遠觀 . . .)

講番俄羅斯既Blini，除左加魚子醬外，仲有甜食或者其他餡料。

唔想冒險幫襯大餐廳還可以認住哩個冬菇亭，平平地試下囉！

再唔係又可以試下向士多買魚子醬同多士，鍾意飲酒既再買埋支俄羅斯孖蒸(Vodka)去附近公園廣場泥個high tea囉。(哩樽cheap野泥，~HKD 20睇相都呃得下架)

俄羅斯Vodka出名就係人都知，不過亦唔可能當水飲，不過哩種無酒精成份既麥啤就唔同喇，男女老幼都0岩飲，味道帶少少酸味，有DD似烏梅汁，當然又冇咁好味啦，味道淡淡夏天飲用相信有助降火！(見下圖婦人手上拎住個支就係)

上一篇：俄羅斯狂熱 - St. Petersburg 聖彼得堡 III

下一篇：俄羅斯狂熱 - Other Delicacies

2010年7月5日星期一

俄羅斯狂熱 - St Petersburg III

向俄羅斯最後一日既行程，原本打算去埋Catherine Palace不過由於唔想太趕，最後決定放棄，寧願慢慢行下睇下，今日重點遊既地方叫 Peter and Paul Fortress (Петропа́вловская кре́пость)，從The Admiralty 途步行過去大約30分鐘，穿過The Palace Bridge (Дворцо́вый мост)首先見到既係The Stock Exchange and the Rostral Columns，兩條大小相約既雕柱都幾得意，好似將首船支解左咁。

The Admiralty (Адмиралтейств-коллегия)

從Palace Bridge 橋仲可以影到冬宮同埋St. Issac Cathedral既全景添架！

The Stock Exchange and the Rostral Columns

The Rostral Columns

後面仲有一條柱架

哩艘咁靚既復刻帆船其實係餐廳泥架！

我地沿住海邊一路行，經過左個沙灘就到，砲台範圍都幾大，仲有好多地方行，有監獄博物館，教堂，俄羅斯生活博物館，舊衫舊野乜都有得睇。

今日天氣好好，個天藍到！

哩到咁大咁靚又點會係免費先得架，記住學生買飛有優惠架！

睇外面仲以為係簡單教堂，原來裡面都好有睇頭架喎！

慢慢行都要3個鐘架！

俄羅斯到處充滿藝術氣息！

離開砲台我地坐番巴士出Nevsky大街，先去睇下著名既 St. Issac Cathedral (Исаа́киевский Собо́р)，哩座教堂應該係傳統天主教堂，所以見唔到洋蔥頭，換泥非常莊嚴硬朗既外型，仲以為係國會大樓添。旅客可以入內參觀，分登頂或者齋睇室內兩種門票，今次我就淨係揀左攻頂，諗住順便欣賞下聖彼德堡全景麻。

大約行10層樓左右啦！

行完教堂好快就見到 Monument to Nicholas I 雕像，圍住既地方叫 Isaakievskaya Square，四圍都有車行，變左個古董迴旋處！

從St. Issac Cathedral頂睇晒全景

上一篇：俄羅斯狂熱 - St Petersburg II
下一篇：俄羅斯狂熱 - Local Cuisine 俄羅斯菜

2010年7月4日星期日

俄羅斯狂熱 - St Petersburg (聖彼得堡) II

7月初既聖彼德堡比莫斯科更夜天黑，晚晚成1點鐘先黑齊，加上大部份景點都係銅像廣場之類，唔一定要入場參觀，所以真係可以慢慢行，個人覺得聖彼德堡真係幾靚，感覺好歐洲，露天茶座又多，算係一個幾好Hea既城市！

Palace Square (Площадь Декабристов / Dvortsovaya Ploshcha)

正對住冬宮前方既就係皇宮廣場，正中央既雕柱叫 The Alexander Column (Алекса́ндровская коло́нна)。

The Winter Palace (Зимний дворец) 成人門票300 rouble(學生免票)

亦即係著名既The Hermitage Museum (Государственный Эрмитаж)隱士盧博物館，仲係世界三大博物館同巴黎羅浮宮，英國大英博物館齊名咁話。所以係聖彼德堡必遊既主要景點，無論團體亦或個人，都要排長龍入場，我地8點幾就開始排，9:30開閘放第一輪人入去，未入得住入到去要再排直到10點，大門先會打開，之後仲要衝入去售票處，真係唔講得少，晏D泥我估都入到場既，不過越遲泥人就越多，似十足女人街咁，加上哩到冇咁好秩序，同埋又俾影相，所以遊客停留更耐，唔想同人迫真係要請早！講番轉頭古董歷史藝術既野，我就真係唔識，加上又冇英文註解，睇到一頭霧水，不過皇宮入面真係靚得好緊要，拍得住羅浮宮架。

Peterhof 彼得夏宮(Петерго́ф)

如果話冬宮等同巴黎羅浮宮既話，咁夏宮就一定係凡爾賽宮喇。之前上網睇過話夏天向冬宮門口對面碼頭有船直去夏宮，十分方便需時35分鐘，我就當然揀左哩條最方便既水路走啦，點知原來船費好貴，竟然索價500 rouble一程，嘩！要成170港幣一程呀，過澳門都唔使咁貴囉！Anyway 最後都坐左船，一到碼頭就對正夏宮花園，單單花園門票就要收350 rouble，要睇埋其他皇宮就要逐個收費，真係好靚架不過可惜唔俾影相，單一門票要500 rouble架麻，保安非常嚴密，真係一張相都偷影唔到囉！其實泥夏宮主要都係參觀皇家園林，係好大好華麗，不過平時睇得太多香港豪宅樓盤廣告，覺得熟口熟面，當然哩到先係正牌五星級的家啦！