2008年9月21日星期日

『及』時行樂 - 杜拜 Dubai

開心時間過得快,終於泥到此行既尾站杜拜,話就話旅行團安排左半日city tour,實情就只係坐向車入面指下左指下右,跟住就拿拿臨,安排各人趕往自由活動囉,我地有兩個選擇,一俾USD 90去Dessert Safari,包括沙漠四駒車,中東Hana(~畫手)同食BBQ!二俾USD 190 去帆船酒店吃個Dinner Buffet 順便參觀下酒店,我當然簡三啦,就係乜都唔俾,自己四圍行下,本來諗住住自己去其他景點行下架,不過當日天氣實在好悶熱,雖則話只有40度左右,但係就非常焗好似打風前既天氣一樣,之前兩日睇當地新聞話杜拜有沙塵暴,可能就係因為咁搞到悶熱啦,真係好辛苦一出機場就好似抖唔到氣咁!所以改變計劃,齋留向運河酒店就算喇!

第一站 Palace 皇宮
今日既杜拜就係金錢同物慾既代名詞,當然我從來都唔認為有錢係罪,錢更加唔係萬惡,善惡只在乎意念之間!咪以為佢地係暴發戶就淨係識洗錢,其實佢地近十幾年泥,不斷提升國民既生活水平之餘仲好著重教育,同時又四處大興土木泥提升當地既旅遊事業,佢地就係知道個油田遲早一日會乾塘,如果唔好好教育下一代,兼開發石油以外既業務,總有一日會打回原形,咁有遠見既政府先係路架麻!唔係話今日俾人上街鬧兩句,第二日就話請大家食番粒糖就當無數囉!唔該攞個心出泥搞好佢啦,唔係話做好份工咁簡單架!今時今日咁既服務態度係唔夠既,凡事都要攞個Heart出泥先得架!

第二站 Burj Al Arab 帆船酒店

絕對係杜拜既Landmark,試問一提起杜拜有邊個唔識佢先!睇番團友D相,裡面都唔係真係咁巴之閉0者!聽佢地講個Buffet 唔係咁掂,搵D好野吃下都冇喎!鵝肝魚子醬sorry通通欠奉!俾得起成HK$1900,倒不如分3餐幫襯香港米之蓮餐廳好過啦!起碼又有多3日開心,仲可以執番正個 look時去添!

第三站 Al Qsar Hotel 運河酒店
足足行左4粒鐘,好彩哩個 shopping centre 夠大,賣既又係手信同一D當地特色野,如果唔係都幾難磨到夠鐘囉!加上運河酒店同帆船酒店好近,好多位置都可以影到,好過頭先向沙灘影過去,背晒光好似隔住層煙咁!

*好彩入面個商場都幾大,勉強都可以行番粒鐘既!

* 以傳統阿拉伯式既風格建築,非常有一千零一夜Feel呀!

* 叫得做運河酒店當然水頭充足啦!沙漠都有水?有油就乜水都有啦!

*從運河酒店可以清晰咁見到對面帆船酒店架,日頭靚,夜晚仲靚,事關入黑後酒店外牆會不停變色添架,係咪幾靚呢!



第四站 哈利法塔 Burj Khalifa (全世界最高摩天大廈)
哩個影咪就係坐車時導遊指東指西下見到既全世界最高既摩天大廈 - 哈利法塔喇!終於向2010年正式開幕,今次就睇唔到真身喇,不過睇左Tom Cruise套Mission Impossible 4都算見識過囉!有機再泥過吧!

後記:今次旅程都幾滿足呀,跟團有跟團既方便,自由痕亦有自由痕既樂趣,不過如果想影靚相的話,我都係prefer自由行多d,團友太多影相就位好鬼煩架麻!

上一篇:『及』時行樂 - 紅海 Red Sea

2008年9月20日星期六

『及』時行樂 - 紅海 Red Sea

離開樂蜀下個站就係洪加達,我地又要晨早起床,不過一D都唔清新開朗囉,足足要熬幾點鐘車程先到,沿途只有無盡既礦野同沙漠,不過咁辛苦泥到哩到,唔等於好玩囉,個人認為哩日係全程最無聊既,零行程連食晏都唔包,要自己搞掂,當然一場泥到洪加達,點都要去望下個紅海啦,所以我地就報左旅行團既自費活動USD 40,坐觀光船去紅海玩浮潛,都唔知搞乜間酒店離個紅海鬼咁遠,唔join哩個活動既人就只可向坐車時隔十萬九千里遠先望到個海囉!酒店係就係好大,但係乜都冇!唔去泳池游水就只可以返房瞓覺架咋!金X旅行社你地真係有需要檢討一下囉!
* 離開樂蜀初時,沿途都幾靚有條小河,不過行左冇耐就去到沙漠喇!乜景都冇,最0岩瞓覺!


* 終於泥到紅海,真係好靚呀!不過沙灘泳客唔算多,又冇型男索女!話時話D水真係好鹹架,絕對不能入眼,你睇水上面個戊李浮得幾爽就知D水有幾鹹啦!


* 講番個海真係好靚,肉眼所見一望無際,個海又清沙又幼,海水都有幾種藍色,真係好吸引!當日天氣都唔錯,都唔算太晒,但係海有小浪中浪以及大浪,對我哩個陸地人泥講,真係好險,差D要當眾表演喟魚呀!



* 哩間係洪加達住既酒店,齋睇下型好似好靚,內裡其實好普通,好住家Feel!


2008年9月19日星期五

『及』時行樂 - 樂蜀 Luxor II

玩完熱氣球我地就返番酒店食個快早餐,之後join埋其他團友再去尼羅河西岸,近距離參觀帝皇谷同其他景點。
第二站 The Valley of Kings 帝皇谷 (70L.E ~ HK$110 包睇3個墓)

尼羅河西岸當地人稱之為死人地,皆因個邊山多礦野多係安葬古埃及歷代法老既地方,單係哩個帝皇谷就起碼有三十多個陵墓,幾千年來經歷過無數次俾人洗劫,陵墓內都已經所淨無幾,好在近幾十年發掘出一個圖坦卡蒙陵墓,雖然佢唔係乜野大法老,九歲登基19歲就死左,但係當中既陪葬品亦有不少珍貴文物,除左佢副木乃伊之外,好多都搬左去研究同埋安放向昇開羅既埃及博物館,想睇佢副黃金面罩既就要去博物館先得喇!雖然裡面冇乜貴重野睇,但係個到D壁畫仍然保存得好好,色彩圖案都仲好清晰,不過以我估計按佢地今時今日咁既保存方法,10年20年後應該可以報銷架喇!真係想睇襯早啦!圖坦卡蒙陵墓係要另外買飛既(80L.E ~HK$130),雖然又係不准拍攝,但係都好值得睇!



第三站 Al-Deir Al-Bahari Temple 女皇殿

哩座女皇殿正正就向帝皇谷隔離,係祭祀埃及唯一一個女法老Hatshepsutel而起既,哩位女皇都有d似當年武則天,佢原本係皇后,皇帝死左之後就由幼子(唔係佢親生既)繼位,佢起初都只係攝政架咋,後來就篡位自立為皇,因為埃及歷代都冇女法老既原故,所以平日佢都係男裝打扮,一直做佢既皇帝直到死為止,甚至死後佢既雕像都係男性模樣,你都咪話唔搞野囉!


第四站 Karnak Temple 喀納克神廟



聽講係埃及最大規模既神廟,歷時一千五百年到左阿歷山大大帝年代決定停建,雖然仲未起好但係今時今日入到去仲有一份攝人既力量,一柱一石仍然係無懈可擊,裡面放左兩條半方尖碑,點解會有半條?事原係因為有其他法老將前女皇個條整爛左喎!方尖碑又係乜泥,係古時皇帝死前為自己歌功頌德而立個囉!全世界既皇帝都係咁架喇!中國古時既皇帝咪又係將自己比喻成天子,埃及既法老咪一樣話自己係神,個個仲為自己起神廟建神像,你都咪話唔自大狂囉,相對上我地中國就謙虛好多,起碼從來都冇皇帝會為自己起座廟時啦,皇帝做像就更架唔會囉!最多咪叫人幫自己畫下畫咁0者,點會咁勞民傷財呢!就連秦始皇都唔會囉!中國人是有福的!

第五站 The Colossi of Memnon 萬農神像


萬農神像把守著帝后谷既入口,本為被奉為神既阿蒙荷泰普三世和皇后的石像,可惜歲月催人經歷上千百年既風吹雨打再加埋地震,經已面目全非了!傳說中,萬農係著名既特洛伊戰役中被幫助了此城,仲殺埋敵軍個仔,可惜最後自己亦被復仇既何里斯所殺,萬農既母親於是請求希臘神宙斯俾佢個仔每日最少醒一次,所以每日清晨,萬農像會發出一陣陣長長既嘆息聲,泥回應母親 Aurora。

第六站 Luxor Temple 樂蜀神廟

哩座神廟係供奉阿蒙神而起,主要係當時既法老皇想同世人講其實佢係神既兒子,並非凡人,廟內既壁畫亦有詳情刻劃佢既誕生傳說。影夜景本來都唔錯既,可惜完全冇準備連又腳架都冇,加上實在太黑,好多地方連睇都未睇得真囉!點影呀!?




下一篇:『及』時行樂 - 紅海 Red Sea

2008年9月18日星期四

『及』時行樂 - 尼羅河遊蹤 Nile River Cruise

跟團一般都有尼羅河遊船哩個環節,自由行通常就只會簡陸路喇,事關平好多,所以向船過既哩4日3夜係最爽既,唔使舟車勞頓咁辛苦囉,話雖如此每日既morning call 仍然係4、5、6點,不過好多時下午4 - 5點就會返上船休息下既!

我地間房好好彩係望海既,唔係睇街景,第一日上船瞓醒晏覺打開窗就睇到日落仲有幾首Faluca帆船添,非常寫意!


除左望下海之外,船上仲有好多活動,好似有接毛巾表演,以前成日聽人講座尼羅河遊船,會有意外驚喜,入房可能會見到各式各樣唔同既毛巾布偶,可惜我地等左好耐都冇Surprise,好失望呀!


膳食方面,總括10日旅程,個人認為船上既膳食係最得既,飲品唔包,餐餐都要叫1L礦泉水 (15L.E ~HK$25),4個人share番都唔係好貴0者。


食飽飯冇野做呀,又可以上岸行下市集,個人認為亞斯旺既市集最平,同埋哩到人冇開羅咁多,條路又闊D,講價又易D!

*哩杯係鮮炸蔗汁1L.E ~HK$1.5超抵飲,超香甜!除左蔗汁仲有石樓汁同芒果汁都係精選推介!

*哩D一籃籃既係大紅花乾,當地人好興加D糖用泥沖水飲,味道有D似紫背天葵,當然係難飲好多個隻啦!

再唔係可以落吧睇人跳舞,有傳統旋轉舞同肚皮舞表演,非常精彩!再唔係自己去船上既紀念品商店用一蚊美金租番套埃及衫玩下cosplay都唔錯架!


2008年9月17日星期三

『及』時行樂 - 樂蜀 Luxor I

第一站 樂蜀熱氣球

泥到樂蜀哩站節目非常緊湊,晨早3點半就 morning call 起身坐熱氣球,導遊話哩個係頭輪,既可以睇到日出,其後去既景點又唔怕晏左去搞到要同人迫喎!咁又係有佢道理既,辛苦D都抵啦!講番坐熱氣球,哩個項目其實係自費活動,本來都唔想玩,事關每人要USD 160,計番港幣折合$1200大元,對我泥講真係好奢侈,但係聽完導遊介紹之後,又好似好得喎,佢話向樂蜀坐熱氣球唔單止係升上天,而係升上天之後真係可以睇到一望無際既風景,一次過遠眺帝皇谷、孟農神像、尼羅河兩岸,當然仲有就係晨光第一線啦!既然咁遠水路泥到,睇怕都唔會再有下次囉,一於豪盡佢啦!

*向尼羅河遊船上左岸,就改坐哩一艘街渡過去西岸,到左岸之後再轉坐van仔去坐熱氣球既地方,天仲未光,現場淨係見到十幾個大氣球,心情相當興奮,每架氣球大約可以坐到二十人左右,為免大家向上面行泥行去搞到唔平衡,個籃仲分成幾個小格,每格企4個人唔使爭,機師亦係由英國受訓番泥佢講,一開始先同我地講解升降情況,同埋一D基本常識,之後就馬上升空,全程大約1小時,上面既風景的確同導遊介紹既一樣,詳盡可見下圖,真係值回票價架!




*發現農民住既都係無頂屋,唔知係咪熱呢,見佢地瞓晒向天台既,只係好簡單咁用D乾草舖向地下加張被就瞓,男女老幼都係咁,當然我地經過會噪醒佢地啦,有D都鬧鬼我地架,不過有好多都見怪不怪喇,仲起身同我地揮手添,仲見有D向到烤緊餅,叫我地落去食呀!好搞笑!


*今日恆指跌破萬五點,個個都一臉灰,其實比起哩班農民,我地已經活係人間天堂喇!睇開D放鬆D啦!反正後悔都太遲啦!


上一篇:『及』時行樂 - 亞斯旺 Aswan II