俄羅斯狂熱 - Moscow 莫斯科

Bolshoi Theatre 俄羅斯國家模範大劇院
位於紅場附近，步程約10分鐘，由於唔睇表演所以只向門口影左幾張相就走。

Christ the Savior Cathedral (Храм Христа Спасителя)
交通：Metro Line 1 - Kropotkinskaya (Кропоткинская)
座落於莫斯科河旁邊，Patriarshy Bridge接連住，可惜夏天日落太遲，冇專登泥影夜景，想必夜景一定好靚。其實哩座教堂並唔係乜野古蹟泥，因為舊教堂原來向1931年已經被前蘇聯炸左喇，而家哩個咁新咁靚既只係1994年復刻版，拜訪當日係星期一早上唔知點解唔開門既呢？

Peter the Great Statue
交通：Metro Line 5 - Park Kultury (Парк Культу́ры)
從Christ the Savior Cathedral睇過對面岸就可以見得到聖彼德像既背面，就咁睇以為好近，所以原本想行過去影埋個正面，不過行到半路發覺要再兜路行，起碼要行多半個鐘以上，所以放棄。如果想睇正面既話，應該坐地鐵搭多一個站就可以。

Triumph Arch 凱旋門
交通：Metro Line 3 - Park Pobedi (Парк Победы)
聽講係1812年俄羅斯打贏拿破崙後而建！唔怪得同下面個景勝利公園起得咁近啦！原來係套餐泥既！

Victory Park 勝利公園
哩個廣場其實都係新起既，好似係向二次大戰之後，聽講每年5月9日既俄羅斯勝利日都有慶祝活動向哩到舉行。

*勝利公園旁邊仲有一座小教堂，起向小山坡上配上青草地，感覺好舒服。

Vernisazh Market
交通：Metro Line 3 - Partizanskaya (Партизанская)
之前俾atnext travel講話應該向Izmaylovskaya (Измайловская)落車，點知落左車之後再問人，人人都話應該前一個站落先0岩，果然搭返轉頭，出左車站再問人，行幾分鐘就到，網上對哩個市集資料唔多，有D話只係開星期六日既朝7晚6喎，為免有誤我地就向星期日下午趕過去，去到差唔多都5pm幾，果然有D舖頭開始收緊檔，不過仲有D開緊，其實檔檔賣既野差唔多，價錢有平有貴，襯人家執野走人時講價最易話為，當然亦不能太過份，否則阻人收工實在罪大惡極！

*售價350 - 1000 rouble不等，視乎手工大細而定，St basil's cathedral造型加上俄羅斯樂章，實在好有收藏價值呀！我都買左個音樂係Moscow Nights既(N年前林子祥有首歌係用哩支曲架)，有團友就買左個配天鵝湖舞曲，調子一樣耳熟能詳！

*俄羅斯套娃當然要買啦，大至三呎細至手指頭都有，售價30-1000 rouble或以上都有，打開起碼有4-5個娃娃。平既可以買蚊型套娃電話繩，幾百rouble一大袋！

好盲頭烏蠅 (Carrie Chau) style喎！

Ulitsa Arbat 阿爾巴特街

交通：Metro Line 3 - Smolenskaya (Смоленская)

長長既步行街，主要都係遊客居多，除左餐廳就係手信舖，價錢當然唔會平得過Vernisazh Market啦，不過手工就精緻D，豐儉由人啦！

Eliseyevsky Gastronome (Address: Tverskaya ulitsa 14)
交通：Metro Line 2 - Tverskaya (Тверская)
睇新假期介紹哩間24小時高級俄羅斯便利店，話Okhotny Ryad (Охотный ряд)站最近，哩個站亦即係最近紅場個站，結果我地沿Tverskaya ulitsa一直行足足行左30分鐘有多囉！

*又係買手信既時候，傳統套娃等價錢貴到不得了，要買就應該向唯到買Vodka (Водка)，魚子醬等。哈哈，最好唔好買absolut vodka喇，事關香港7仔都有啦！

HKD 1400樽超貴呀！

上一篇：俄羅斯狂熱 - Moscow (Red Square)

下一篇：俄羅斯狂熱 - Moscow Metro

俄羅斯狂熱 - Moscow (Red Square)

莫斯科既行程其實唔難編排，單係紅場加姆雷宮快快行都夠你玩足一日啦。
Alexander's Garden (Александровский сад)
離開克里姆林宮，沿住紅場有個公園，叫做Alexander's Garden, 唔怕晒兼有閒情逸致既話，大可以除左對鞋行落草地泥個野餐，再行過D就會見到一個跑馬水池，除左出馬仲有好多有趣既童話故事造型雕像，適逢天時暑熱最0岩，見到好多小朋友都跳晒落水大玩特玩！原來俄羅斯人都唔係咁cool 0者！

花圃

唔知係咪出自某個童話故事呢?

Monument of soldiers 無名烈士墓

水池再行過D好快就會見到哩到，哩排日日都成35c，見到哩兩位士兵烈日當空下，仲要著成咁企向到唔郁得，真係辛苦過打仗囉！哥們，小心中暑哦！

真係無遮擋曝晒架陰公！

Lenin Mausoleum (Мавзоле?й Ле?нина; Mavzoléy Lénina)

每日只限 10am - 1pm對外開放，聽講俄羅斯政府長期保養列寧條C都使不少喎。

National Historic Museum
列寧墓隔離就係國家博物館，做型真係超靚，白雪雪既屋頂似十足積左一層白雪，加上紅色屋身，令人聯想到搖搖樽入面既童話古堡。

正面

後面

St Basil Cathedral (Собор Василия Блаженного)

正對住國家博物館既就係頂頂大名既俄羅斯地標聖巴素教堂，幾粒菠蘿釘最易認，不過入到裡面就有少少失望喇，因為並冇想像中咁宏偉，分成一個個細偏室，感覺唔夠莊嚴，但係設計獨特，同歐洲一般大教堂感覺好唔同。話晒都係國家地標俄國真係要努力D保養下佢先得喇！

門口兩條柱有d似理髮店囉！

Kazan Cathedral
夾向博物館同聖巴素中間既就係哩座小教堂，冇乜特別似手信店多D。

GUM 百貨公司
與其話係百貨公司不如話係個商場仲貼切，建築物係好有特色，不過大熱天時冇冷氣都咪話唔難受囉！入面樓高三層乜野名牌都有，就係冇退稅咁就當然唔會幫襯啦！晚上亮燈後更加靚，想影靚相記緊自備腳架呀！

上一篇：俄羅斯狂熱 - Moscow (The Kremlin)

下一篇：俄羅斯狂熱 - 莫斯科 Moscow

俄羅斯狂熱 - Moscow (The Kremlin)

近年去海外旅行都選坐國內航空公司，今次去俄羅斯又係坐國航，經北京轉機，冇他既唯一理由係價錢實在平，加上同日抵步，去到都只不過係下午5-6點，check 完 in跟手食個晚飯，0岩0岩好夠鐘瞓覺，瞓足精神第二日正式出擊！比著以前我一定會揀坐半夜飛既航班，諗住可以慳番坐飛機既時間，晨早一落機就可以馬上行程，今時今日真係唔可以去到咁盡，就算向飛機瞓得著，落左機個人仍然未回魂，仲話要行足一日喎，實在支持唔住囉！
第一站 莫斯科機場落機見到莫斯科SVO機場第一個印象就係殘舊，同我國比較實在差太遠，殘舊程度同上海虹橋機場相若，話晒都係首都國際機場呀，有乜理由咁流架！迫左幾轉終於出左閘，聽講莫斯科交通經常擠塞，為免有誤決定選坐比較貴既aeroexpress，300 rouble直達市中心Belorussky 火車站(Белорусский вокзал)，然後再轉坐Metro Line 5 - Belorusskaya (Белору́сская)去hostel。

第二站 The Kremlin

交通：Metro Line 4 - Alexandrovskiy Sad (Алекса́ндровский сад)

克里姆林宮既入場費有好多種，齋睇紅場教堂等景點門券只須300 rouble，如果想睇埋軍事大樓既套票就要700 rouble，不過據其他blogger講冇乜好睇。

* Kutafiya Tower - 克里姆林宮票務處兼入口，早上10點先開門，未夠鐘已有不少人排隊等入場，原來團體先要排隊，散客唔使架！不過大袋背包一律不得入內，要記存向tower橋底個收費 storage counter。

* Cathedral Square - 一次過見到好幾間大大少少既洋蔥頭教堂，哩個範圍比想像中細，教堂亦唔係話好金碧輝煌個種，不過勝在任影唔嬲，對遊客泥講實在一大樂事，可以盡情將所見所聞通通拍低晒！

The Cathedral of the Annunciation

Cathedral of the Dormition

Ivan the Great Bell Tower

* 適逢周六有閱兵儀式，未到12點已經搵定有利位置睇表演。

* Tzar Bell

* Tzar Canon

上一篇：俄羅斯狂熱 - 準備篇

下一篇：俄羅斯狂熱 - Moscow (Red Square)

俄羅斯狂熱 - 準備篇

機票
香港航空由今年6月30日起新增設直航莫斯科航班，機票價錢仲低至3500元，國泰有見及此又出減價戰，7月13日起全線莫斯科直航機票賣3600元，不過好可惜我地鐵定6月25日出發，享受唔到以上優惠，最後又幫襯左國航，連稅都係4700大元，經北京轉機，都只係比上述航線坐多3小時，都咪話唔超值！當中有兩位團友揀坐東航，貪佢向上海轉機，順道去埋世博會，嘩真係至抵精明眼呀！

行程編排
俄羅斯既旅遊資訊坊間唔易搵到，最多人參考既就只有lonely planet，不過唔知點解我就最唔鍾意參考孤獨星球既資料囉，上網睇下其他網友既行程，或者睇睇坊間旅行社既行程咪仲實用。最後總括各方資訊，10日既行程大可以分配為3日莫斯科2日金環(Sergiyev Posad + Vladimir + Suzdal) 3日聖彼德堡2日飛機。

酒店
訂酒店除左價錢要相宜之外，位置最緊要，既要近地鐵站，亦不能離主要景區太遠，以盡量少搬酒店為大前題，Moscow stay一間，金環一間，St Petersburg一間，最後Moscow 搵左間位於紅場附近既Rainbow hostel，大約5分鐘步程可到地鐵站，6人Dorm房價每人每晚800 rouble，register另加700 rouble，哩項收費係最呃錢既！金環揀左向Vladimir為中心站，不過網上搵唔到哩個地方有任何hostel既資料，所以搵左間酒店叫Zarya，雙床房都係每人每晚875 rouble，獨立浴厠間房又大，最正係check-in起計24小時，我地成10pm先到，變相住到第2日10pm先走，0岩晒我地行完番泥仲有時間沖番個靚涼先搭通宵火車去St Petersburg囉！仲免費提供埋register添，其實除非向同一個城市住上三日或以上，否則係毋需辦理register既。register既意思其實都係旅館幫外國客人上網做個登記，証明哩個外國人向佢地到住，我估主要係基於國家保安理由掛，收費就間間酒店唔同，一般都係~200 - 500 rouble不等，做好register後酒店會俾番張receipt你，有你個人資料亦有酒店official 蓋印，都幾有用架，去火車站買飛遇正cashier唔識睇你本passport時，可以叫佢照住張receipt泥入資料，真係少好多煩惱架！去到St Petersburg我地間Location hostel真係超就腳，向正Nevsky Prospekt 大街盡頭，The Admiralty 對面，行過幾步就係The Hermitage同其他重要景點，不過衰在冇電梯，要行上唐四樓都咪話唔索氣囉！價錢都唔貴既700 rouble，register收300，地方大少少，免費用洗衣機、電腦上網，同埋風筒盪斗任借添。

交通
Metro
向Moscow既主要交通工具係一對腳，事關紅場、St Basil's Cathedral、The Kremlin、GUM等等既重要景點都聚埋一起，基本上行一日都應該可以行得晒，其他景點就可以坐地鐵即係Moscow Metro，出左地鐵一般行一陣就搵到，非常方便，地鐵票價單程26 rouble，多過一個人一齊玩既話，最方便都係一次過10程票 (240 rouble)，否則次次排隊買飛都好sign時間囉，Moscow地鐵入閘時do卡，出閘就唔使，想遊番個Moscow 地鐵河，一程車飛就可以搞掂，認真超值！St Petersburg主要交通都係靠一對腳，因為景點實在好集中，St Petersburg Metro車票就以coins形式，每次入閘入一個coin，買10程票既就一次過俾10個coins你，要小心袋好囉！不過其實向st petersburg好少可坐地鐵，事關大部部景點都離唔開Nevsky Prospekt 大街兩旁既，所以散買就得喇！

火車
向俄羅斯坐火車真係煩死人，是關所有外國人買票都要出示passport，因為要輸入姓名同證件號碼，不過向火車站想搵個英文字睇下都冇，個個雞同鵝講，溝通絕對係一大問題。往來moscow同St Petersburg既通宵車，亦相當爆滿，所以20日前已經上網買訂(網上預訂最早21日前開售)，俄羅斯火車聯網當時亦只有俄文版(而家全英文好好多喇~)，望住個website同睇住一埋亂碼頁面跟本冇分別，好在又俾我向網上搵到有blogger 翻譯基本網上訂飛概況，咁就順利買到飛喇！網上碌卡買飛試勻手上多張信用卡，最後竟然俾HSBC勝出，唔通係因為HSBC向俄羅斯有分行，所以識別得到！？上網訂好飛其實都只係成功左一半，因為去到莫斯科仲要去火車站用(touch screen)Kiosk印番張飛出泥，個部機又係只得俄文，拎住手上個張網上訂票收據，對住部機亂咁禁，最後出左一個畫面，分成三大欄，以我推斷應該係：(訂單編號)(乘客類別)(乘客證件號碼)，只要填寫番訂購時輸入既資料，正確冇誤就會自動打印車票，話說部機本來係有個scan barcode既function，但係scan完都出唔到資料，最後要人手輸入，玩左成個鐘先出到票，差D俾佢玩死！，仲有就係訂車票時，要睇清楚邊個火車站上落車囉，事關moscow有好多個火車站架，行錯左就煩喇！所以最好預早一個鐘到車站啦！

網上訂票

出票Kiosk

成功打印

三等艙 (好似監獄風雲場景囉！)

二等艙 (4人一卡，下格床貴D)

機場
俄羅斯同大陸真係難兄難弟，D人又係唔鍾意排隊既，落飛機過關竟然分得兩條line，一條俄國公民，一條外國人，嘩！一架飛車冇3百都有兩百人掛，得個2條line你話要等到幾時先過到關呢！離晒大譜！過完關拎行李後又要再過海關照X-ray，又係一群人湧向個閘口，又係要迫餐死先出到去。回程時仲混亂，check-in前要先排隊過海關，得一部機一條隊做成班機，真係預早3個鐘頭到先0岩0岩好囉！佢地對中國人又特別嚴，機乎個個都要番箱倒籠泥驗，真係麻煩！

Moscow aeroexpress (莫斯科機鐵)

個人認為向俄羅斯旅行，好有玩amazing race既感覺，當然之前做足準備功夫，可以大大減少麻煩，如果唔係都幾惡搞囉！tips係行程上既景點、酒店地址或者火車站名都必須要預先copy & paste埋相關俄文，如果去到問路又問唔到，自己又睇唔明就死硬啦！

上一篇：俄羅斯狂熱 - 序

下一篇：俄羅斯狂熱 - Moscow - The Kremlin

俄羅斯狂熱 - 序

舊年仲有3日半假要7月前放埋，當然係我計劃之內既事啦，今次既目的地鐵定去俄羅斯，之前聽人講俄羅斯治安好差，當地人又cool，起初都有D擔心，不過此行算係一呼百應，好快就搵夠6隻腳，咁多人一齊去實冇有怕啦！

俄羅斯都算係歐州城市之一，不過語言並非用拉丁文字，假如你認為雞腸難明既話，咁鵝腸就更難明，字母系除左有幾個類似ABC既英文字之外，仲有其他星星月亮既符號睇落都有D似希臘文，真係少D眼力都唔掂架！加上網上搵到既自由行資料又少，就連上網訂火車飛都只得俄文版，最後好見到其他blogger介紹有個英文website有簡易翻譯，先可以順利訂票，當然去到當地取飛又有難度啦！所以今次編排行程特別有挑戰性，而家順利完成亦好有成功感，哈哈！又要認下叻先！

經過今次旅程，對俄羅斯完全改觀，俄國人其實都好熱情友善，型男美女又特別多，雖然向St Petersburg亦差D俾人打河包，不過治安其實都唔算話好差既，事關旅遊區有小偷出沒，我估旺角女人街都唔少囉！最重要都係旅客要提高驚覺，揹背包既就要加倍小心就自然玩得開心啦，至於警察屈錢，機場行李被盜既事，我地就好好彩冇遇到喎，成日都會見有警察行過，不過從未見過佢地查旅客passport喎，盤紋身佬就見到，行李亦冇俾錢做打包，返屋企都冇發現唔見野囉，反正喼入面跟本就冇值錢野，值錢野都唔應該帶去旅行啦，就算帶去旅行都唔會咁on居放入喼入面囉，個喼除左污嘈衫就係得番D俄羅斯手信，斷估唔會偷番我向俄羅斯買既手信掛！哈哈

下一篇：俄羅斯狂熱 - 準備編