越浦越開心 - 柬浦寨 金邊Phnom Penh

從胡志明市過柬埔寨，最快既方法當然係坐內陸機啦，但係貴呀麻，既然今次時間咁充足，所以揀左個慳錢既方法就係坐大巴，早兩日已經向Sinh cafe買定巴士飛，每人USD 12大約左5-6個鐘頭，其實車程唔係真係咁耐架，主要係過關需要等成個幾鐘囉，車程3個幾鐘到啦！我地坐最早班車即係7點鐘出發，去到金邊大約12點半，一到步第一時間call 旅館派人泥車站接我地，放底行李就立即出發去萬人塚Killing Field即係當年赤柬無理殺害柬埔寨人民既亂葬崗，入場費每人USD 3，請多個導遊俾多USD 5，基本上佢地係睇人開價既，人多又收貴D，不過都講得算有dd感情啦，自己睇真係唔知發生乜事架，因為哩到真係幾空曠，邊圍攔住都係骸骨，導遊隨手執起一兩件就講，樹上又掛住幾件爛衫，又係當年既死難者遺物，哩到仲有一座塔放滿頭骨，可能當日天氣幾好，日光日白又冇乜感覺喎！又或者我比較冷酷無情啦！

由於時間既關事，馬上又要趕去S21監獄博物館 Tuol Sleng Museum，哩到原本係一間學校，其後被赤柬用作監禁異見份子既，裡面既課室全部被改建為囚室，每一間房都有唔同既刑具，圖文併貌咁講述每一種刑具折磨囚犯既方法，加上一幅幅受害人既相片，都幾令人毛骨悚然架，行行下撞到有個團佢地仲請左哩到其中一個生還者泥講述當年受虐經過，聽講入得泥既最終只有七個人可以有命返出去，短短幾年間死向裡面既起碼過萬人。不難想像樓梯牆角囚室地板上面既污跡其實係當年死難者留底既血證，比之前萬人塚感覺更震撼！

哩位老先生是當年生環者，聽講只有8個人能夠行得出哩到咋！

第二日一早我地繼續向金邊閒逛，先係上Wat Phnom 塔山寺因為向酒店行幾分鐘就到，冇乜特別山上只有一座小型寺廟。附近仲有d賣蓮花同祭品既攤檔，民風都幾純樸！

柬埔寨同泰國一樣仍然保留住皇室制度，皇帝雖然冇實權但係叫得皇帝點都要俾間皇宮佢住既，金邊既然係柬埔寨既首都，皇宮當然向哩到啦！西哈努克親王皇宮 Royal Palace USD 6，入皇宮都有d規矩既，事關皇帝一家真係向入面住架！著背心、短褲唔過膝、帶披肩者一律不得內進。

皇宮過一個街口就係柬埔寨國家博物館 National Museum 入場費USD 3，裡面既裝修似resort多過博物館，主要擺放左d佛像之類擺設。

上一篇：越浦越開心 - 越浦越開心 - 越全食 III

下一篇：越浦越開心 - 柬浦寨 吳哥窟 Angkor Wat I

越浦越開心 - 越全食 III

落後既地方街頭小食特別多，越南都一樣，適逢春節期間由濱城市場對開直通歌劇院既一段馬路，晚上都會封閉做行人路，有人眾集自不然就有人賣野架啦，估然俾我發現香港幾乎失傳既糖蔥餅，仲有棉花糖添！

鴨仔蛋 – 越南最具特色既地道美食，我估非佢莫屬，幾千盾就有交易，我就唔敢食喇，見到都驚！

烤魷魚– 以前香港戲院門口都有得賣架！

糯米飯甜品 – 食得太飽喇！點有機會試呢！

炸湯圓 – 等於香港街邊炸魚蛋掛！

牛奶果 – 聽講係越南獨有，味道係可以既，之但係肉汁不能佔到咀唇，否則好似膠水咁痴住晒，好難抿得甩架！

Soursoap – 哩種水果外表怪，味道都ok既甜甜酸酸

CAM –其實我都唔知係咩生果，不過照字讀，我估係柑泥，有D似新會橙，皮係綠色，肉係橙色，多水多汁，帶D酸味！有D似大隻版柑桔！

越南粘米 – 越南一向出名盛產靚米架啦！

上一篇：越浦越開心 - 越全食 II

下一篇：越浦越開心 - 柬浦寨 金邊Phnom Penh

越浦越開心 - 越全食 II

越南美食除左Pho之外，其實仲有好多特色美食，好似雪糕店，法國菜、 大頭蝦、煎蛋薄餅、粉卷、春卷、凍檬、蔗蝦、扎肉、稔肉真係數之不盡。可惜胃得一個時間又唔多，再加撞正春節假期，唯有淺嘗，少食多知味亦未常唔係好事！

Long Huy

哩味煎得又大又香又脆既蛋餅，中間隨意加d芽菜、肉片、蝦之類，夾埋九層塔青檸汁一齊食，十分好食，當然唔係間間都整得好食架！

濱城市場

全越南最大既市集，乜都有得賣、衫褲鞋襪、蔬菜生果、土特產手信、外圍仲有露天餐廳，最0岩旅客一次過掃貨。市集既外圍仲開滿大排擋，食左咁多餐Pho，又不如試下越南其他美食啦，近近地就簡左哩間Sao Dong，好在餐牌有相睇有英文介紹，如果唔係真係雞同鴨講，冇得食喇！大排檔風味小炒認真夠晒鑊氣，不過最正要算碟大頭蝦喇，隻隻手掌咁大，為番港紙都係$30隻左右，特別要求加蒜用泥蒸，我個隻就要加牛油泥燒，隻大頭蝦肉質超爽仲好彈牙，加左牛油仲特別香口，蝃膏多到漏，實在令人回味哦！

地道食品

扎肉、稔肉都係越南既特色小食之一，都係預先整定既食物，用泥煮麵夾法包乜都得，同火腿差唔多。

地道小食

粉卷、春卷、凍檬、蔗蝦越南有山有水，食物當然唔會缺啦，要海鮮有海鮮，要肉有肉，有菜有米，可謂物阜民豐，唔係政治問題，越南應該唔會咁落後囉！向濱城旁既Tib Express就可以一次過食晒！

越南法國菜

由於越南俾法國統治過一排，所以無論建設文字以及飲食文化，都有所感染，向哩到亦可以搵到唔少法國餐廳，但係你問我好唔好食，個人就認為都係香港好，好似哩間可遠眺西貢河既Le Caprice法國餐廳咁，食個晏都要成HK$150，實在唔平，三個 courses，真係由個湯到甜品都唔掂，唔怪得當日只有我地一伙人幫襯啦！香港SOHO區任何一間法國餐廳食個晏都係一百蚊左右0者，起碼味道同賣相都贏哩到幾條街啦！一日都係蘋果好介紹，累我俾團友投訴。

Huynh Hoa 法包

法國大餐唔好食唔緊要，哩個法包就超好味，一條普遍法包條，加肉、加菜、加沙律醬，咁就搞掂，味道一流價錢又平！肉有幾種俾你揀，肥豬肘片、扎肉片、火腿， 當中肥豬手肉最正，另外再加生菜、蕃茄、酸蘿蔔條，每份~HK$10最0岩坐長途巴前買泥做早餐喇！

Fanny 雪糕

胡志明市有兩大雪糕店，一間就係蔡瀾介紹過既Fanny ice cream，另一間就係Bach Dang，前者以旅客為主，後者當地人亦常光顧，都係香港既雪糕好味D，哩到太甜亦唔夠奶味，水份太重。不過哩到幾時都係咁熱，泥到點都要去幫襯下既，不過唔好學我咁食榴槤雪糕喇，食番椰青雪糕啦，特色又大份！兩三個friend share都夠食啦！

上一篇：越浦越開心 - 越全食 I

下一篇：越浦越開心 - 越全食 III