春日櫻紅大會 - 嵐山嵯峨野 Sagano

今日主要景點就係去嵐山，一到大阪就已經向JR站買定今日既嵯峨野觀光小火車既車票600円，不過預售係唔可以買第5卡(Open Car)，但總好過到時買唔到飛，再者當日票仲可以轉班車一次，如果到時好天咪轉坐下一班open car囉！向京都駅坐JR可直接去到嵯峨嵐山駅，行過隔離就係小火車站。

坐小火車前首先向嵐山一帶四圍行下先，第一站天龍寺。從小火車站行去天龍寺，大約15分鐘左右，旅客可分別參拜寺院，或只參觀庭園500円，適逢櫻花已滿開，實在夠運！

天龍寺出口處既竹林小道。

沿路返去渡月橋，步程約20分鐘，橋既兩旁既櫻花都算滿開，不過景色就一般啦！無睇相咁靚囉！

行完渡月橋又係時候返火車站，短短20分鐘既車程，從嵯峨開往亀岡，沿路可欣賞到保津川同嵐山既優美景色，雖然唔係坐opencar但係都仲算坐窗口位，影相拍Video一樣冇難度。

行到去JR亀岡駅附近仲看到一大片油菜花田添呀！點解賞花先泥落雨架！實在大殺風景！

下一站係伏見稲荷大社，又係坐JR最方便，不過要先回京都駅轉車，順便幫襯左月台個間立食麵館醫肚，賣400円一碗既天婦羅Soba，實在ichiban！

伏見稲荷大社特別之處在於鳥居，日本所有寺廟都會見到鳥居，不過哩到既鳥居唔係一個兩個，而係數以百計，築成長長既鳥居隧道，可其壯觀，就連藝妓回憶錄片尾都泥哩到取景架！

回程時順便行埋京都駅入面既手塚字虫劇場，探下怪醫秦博士先！

是日晚餐揀左河原町既魚心壽司，一去到就見好多人向門口排緊隊，最搞笑係全店都係香港同胞，旅遊書威力果然厲害，好老實講句，食物係幾新鮮既，但係價錢偏貴每件約300円 - 500円，同埋環境實在太MK，建議大家向以下網址好好發掘，應該有更多更好選擇。www.hotpepper.jp

櫻花蝦壽司

櫻鯛壽司

上一篇：春日櫻紅大會 - 京都 Kyoto II

下一篇：春日櫻紅大會 - 高山 Takayama

春日櫻紅大會 - 京都 Kyoto II

今日繼續京都市內遊，第一站金閣寺，從京都駅坐巴士#205，大約30分鐘就到達金閣寺前，付出500円入場費就係為影哩張相，不過門券竟然係一道符，仲知就係有病醫病冇病強身健體咁啦！都算有心思既！

接住就去平野神社，因為搭車經過驚見櫻花滿開，所以專登過泥睇下有乜景，嘩！真係好靚呀，可惜今日陰天，如果唔係一定會更靚，我地仲見到櫻吹雪添喎！(櫻吹雪 - 大風吹起散落既櫻花花瓣，有如落雪，唔係我老作，日本人真係咁叫架！)

下一站又係花見名所，位於銀閣寺附近既哲學之道，京都既櫻花實在太靚喇，一段不過100米白川通上既小路，兩旁種滿櫻花樹，櫻花已滿開，哄得人實在高興！

行左成朝又係食晏既時候，隨便向哲學之道入左間叫一休既小店，當然順便試埋埋京都名物鯖魚Soba (850円)試下啦！嘩，估唔到甜甜地又幾好食喎！有D似上海既燻魚！

諗諗下銀閣寺估計都冇乜野特別，所以過門不入，轉頭直接去左平安神宮，平安神宮其實都冇乜野好睇，只係適逢當日有對新人穿著整齊和服影緊結婚相，加埋少少櫻花襯托，好一幅大和風情畫！

*點解木口木面架！Say Chesse~

見有少少肚餓就過番去四条烏丸，行轉錦市場，哩到雖然冇黑門咁闊，但係非常熱鬧，按旅遊書推介，第一個check point就係去位於街尾既大安，食番隻即開即燒日本生蠔180円先。

緊接錦市場既仲有新京極，同女人街有D相似，以衣服飾物為主，街中間仲有間小廟錦天滿宮，人流不絕！

之前上hotpepper.jp搵到間食Shabu Shabu兼Sukiyaki放題既日本料理『牛禪』，任食120分鐘都係每位1980円，雖然唔係乜野和牛，但係質素都唔差路，肥瘦適中，實在太抵喇！

上一篇：春日櫻紅大會 - 京都 Kyoto I

下一篇：春日櫻紅大會 - 嵐山嵯峨野 Sagano

春日櫻紅大會 - 京都 Kyoto I

坐JR由大阪去京都車程唔使一個鐘，車費都只係540円，向京都玩坐巴士就最方便，所以泥緊哩三日都會用京都市內巴士一日券500円，住近京都駅就更方便，事關駅口有齊你所需既巴士，日間最多旅客坐既係洛100，運行所有京都主要景點，人龍最長好在班次都好密，等左15分鐘就上到車，通常第一站全世界都會向清水寺前落車，哈哈我地早一個站向五条落，沿五条坂上清水寺。清水寺座落於小山丘之上，向前望可以見到京都塔，如果泥睇夜櫻或者紅葉，應該可以順便欣賞埋京都夜景先走囉！

清水寺隔離有座地主神社，係著名既求恩緣既寺廟，放兩舊戀愛石，就已經吸引到每日成千上萬既遊客參拜，認真唔講得笑，可惜此行團友太多，唔可以咁揚，唯有再等下添啦！哈哈哈

*唔通佢係玉兔？！

離開清水寺，再順清水坂三年坂二年坂一直行，沿路遊人超多，原本都諗住租和服著下既，但係諗諗下都係覺得著住和服又唔方便影相又唔方便行石級，又廢事要其他團友等，所以都係冇租啦！假如你好有表演慾又鍾意被人影相既話，就一定要租泥著喇，事關好多遊客唔理你係中國人定日本人都會走埋泥話要同你影相囉，我都捉左幾個日本人一齊影合照啦，哈哈，係呀我肯定佢地係日本人先會搵佢地影合照架，影番d香港人就冇意思啦！除左著普通和服外，仲有好多女仔會俾錢扮藝妓架，其實都好費解，點解好扮唔扮都扮藝妓呢，十個有十個都好嚇人架喎！同埋最好唔好要求同佢地企定定合照添呀，驚嚇程度簡直爆燈囉！

*影Snapshot咪幾好囉！

*哩位最靚，仲有8分似鄧麗君呀！

沿路一直行，好快就到円山公園，京都既櫻花大部份已經滿開，相比大阪，感覺京都既古雅配櫻花更加靚更優雅。京都一踏入4月已經進入花見期間，大部份既賞櫻名所，都會搞賞花大會，樹底下舖張墊就可以齊齊Happy Hour，円山公園內更有好多小食檔賣各類傳統日式小食，氣氛超好。

離開円山公園就到八阪神社，拜既野都大同小異，除左一般既學業恩緣健康事業之外，竟然連美白美容都有得求，可見從古到今都係女性比較迷信。神社四圍都掛滿燈籠，睇真D原來全部都係京都祗園區一帶著名餐飲名店，仲以為係甚麼祝福語，實情係廣告燈箱至真！

*此泉為美容水，可能勁過SKII噃！

離開八阪神社，望出去就係非常繁榮既祗園區，向前行好快就搵到花見小路，聽聞花見小路係以前風月場所，適逢此時夜幕低垂，氣氛絕襯！當然而家既花見小路，都只係食店為主，不過都仲有藝妓表演既高級日本料理店，所以偶然都會見到一個半個真正藝妓路過架！

*哩張影后相我最喜歡！

今天晚餐選定位於京都駅既炸豬扒名店『名代かつくら』，真係超好味，白飯味噌湯沙律絲都係任添任食，豬扒炸得甘香鬆脆，醬汁酸甜度又適中，水準遠勝香港任何一間日式炸豬扒店囉！

上一篇：春日櫻紅大會 - 姬路城/ 奈良 Nara

下一篇：春日櫻紅大會 - 京都 Kyoto II