情迷法蘭西 - 普羅旺斯(阿維農) Avignon

第三站 普羅旺斯 阿維農 Avignon

經過3日泥既自殺式行程之後，終於到左哩個Trip既戲肉，正式出發去南法普羅旺斯地區，哩區所屬城市鄉鎮有好多，唔係處處都有火車到，所以唔開車其實都有d麻煩，當然南法既旅遊業發展左咁耐，自不然有大把Choice俾各類型旅客啦！為免周車勞頓，我地選定以阿維農 Avignon作跟據地，再作輻射式day trip，果然哩個方法管用，仲可以順便洗下衫添！
Avignon 阿維農
從巴黎坐TGV到Avignon車程約3小時，用火証既記得預早兩日訂位。Avignon既TGV車站位於市區外，所以到抵後仲要轉坐巴士入城，Avignon ville站非常近市中心向正古城牆外圍，坐其他local train (ter)或者巴士 (Autobus) 都可以向哩到上落車。今次揀既酒店Hotel Danieli原來好方便，落左車沿大路一直行大約10分鐘就到，每晚房租為€81/3人房。Avignon哩個鎮仔話細唔細啦，比起其他普羅旺斯城市泥講都算大架喇，同埋都算幾靚幾好住既！哩到既重點旅遊點有兩個：Palais des Papes 教皇宮，Pont St Benezet 聖班納齊橋。加埋其餘幾個景點，被列入世界文化遺產系列。

Le Palais des Papes 教皇宮

* Avignon地方細細竟然會有咁大座教堂，原來哩座唔係普通教堂泥，而係教宗宮相等如今日梵蒂崗，所以起得咁宏偉！

Place de l'Horloge 鐘塔廣場

* 位於教皇宮前既廣場，係每年7月舉行既阿維農節主要表演場地。

Le Pont St Benezet 聖班納齊橋

* 既然教庭向到，自不然有好多人泥朝聖啦，所以咪起左哩條橋囉！不過經歷戰亂同洪水終於斷開左喇！

Rocher des Doms 岩石公園

* 建於山上可欣賞整條聖班納齊橋

其他景點 :

Avignon既旅遊景點，其實玩一天就夠，想再豐富D行程既話，我就選擇左坐坐旅遊小火車 €7，同埋Rhone Cruise €8 (可睇到斷橋的另一邊如上圖)，實行泥個上山下海遊玩盡海陸空啦！


上一篇：情迷法蘭西 - 聖米歇爾山 Mont Saint Michel
下一篇：情迷法蘭西 - 普羅旺斯 Arles & Orange

情迷法蘭西 - 聖米歇爾山 Mont Saint Michel

第二站 聖米歇爾山 Mont Saint Michel

從巴黎去Mont Saint Michel方法唔多，一係自己開車一係坐火車，跟團另計，我地當然就係選擇火車啦！由於第2日就要上島，所以未出發就已經向香港訂定位坐TGV，起碼預早5日前留位，因為一日只得3班車去，錯過左就駁唔到巴士去島架喇！巴黎有好多個火車站，去西部既就要去Gare Montparnasse坐車，如果冇火車證既話，就要成€60一程，去一回都真係唔便宜架！其實去Mont Saint Michel有兩條路，一係經St Malo一係經Rennes，我向網上查到經Rennes既巴士接駁路線比較清楚，所以選揀從Rennes入，坐完個幾鐘車去到Rennes，仲要轉巴士再坐多個半鐘先去到聖島，就算坐最早一班火車去到都成12點幾1點，回程最後一班車係5點幾6點，所以一天往返都幾趕，不過老實講個島唔大，齋行幾粒鐘查實好足夠，不過就欣賞唔到日落美景同埋潮汐漲退既景色喇！由於近年起左條路通向島，所以旅客多左好多，變成旅遊區物價自然爆升，島上既酒店真係幾貴，一晚最少二百歐羅，所以大部份人會住向島外大馬路旁既旅館，價錢最少平一半，不過就要行成半個鐘先去到個島啦！向經濟效益角度泥睇，個人認為抵好多囉！

*晴天

*陰天

*Magic景

*其實全個島既重點係一座修道院Abbey €8.5，位於島既最頂，亦佔全島大約7成地方，點解d人覺得佢靚，相信係因為離遠睇哩個小島真係好似一個西方傳說中既古堡咁樣，有條飛龍圍住個島個款呢！實在俾人太多幻想空間喇！抵佢成為世界文化遺產啦！

*雖然唔係農曆十五，但係潮漲都幾勁架！你睇潮退同潮漲既差別幾大就知啦！

*哩間la Mere Poulard係全島最出名既餐廳旅館，佢既招牌omelette聽講好有名氣，好唔好食我唔知，淨係知佢好貴！

一個煎蛋套餐就要45蚊歐羅，嘩！太過份喇！好在佢地都好慷慨，唔幫襯都有煎蛋表演睇，叫做為哩個小島增添一項少少既娛樂啦！

上一篇：情迷法蘭西 - 巴黎 Paris III

下一篇：情迷法蘭西 - 普羅旺斯(阿維農) Avignon

情迷法蘭西 - 巴黎 Paris III

除左基本景點之外，巴黎食買玩何止咁少呢！仲有好多特色街道一樣咁好行架！
Champs Elysees 香榭麗舍大道
法國地標凱旋門對出既一條街道，就係世界知名香榭麗舍大道，哩條街睇怕都唔多使講啦！正所謂『買LV呀!快D泥Champs Elysees啦！』哩條街有成4個地鐵站，重點行又得，街頭行到街尾又得！短過香港條彌敦道架咋！

哩條街咁出名，食買玩當然一應俱全啦，今次竟然俾我發現左Lido 麗都夜總會有特價飛賣，€45位當然要去見識下啦，記得上次跟團自費活動要多收€160架，今次幾十蚊俾佢啦！好唔好睇呀！？都ok既，厲害之處唔係在於佢地D舞衣有幾少布，而係個舞台D機關有幾咁勁，真係估佢唔到，點解個檯咁細會轉到咁多花臣出泥既！精彩！

Rue du Faubourg Saint-Honore 名牌總會
要買各大名牌貨梗係要泥哩條街啦，除左LV之外，乜大牌都有，人又唔多，條街話長唔長話短唔短啦，行幾耐就好睇人既！哈哈. . .我就行左半粒鐘咋！齋Window Shopping好夠啦！Chanel總店都向附近！

Marche Bastille 巴士底市集
淨係星期四&六6am - 2pm先開檔，乜都有得賣好似花園街咁囉，本來以為會好旺好多野賣，去到發覺有d流，少少失望囉！

Saint Germain des Pres 拉丁區

位於塞納河左岸，有多間著名Cafe，係近百年泥法國知識分子藝術家聚集的聖地。當中Les Deux Magots & Cafe de Flore最有名，就連海明威、Coco Chanel都曾經係常客，要感受一下就記得早D攞位喇，事關露天茶座既座位特別搶手架。

Rue de Buci 巴黎食街

位於Saint Germain區既哩條街，真係超熱鬧，食肆臨立，餐廳裡裡內內都坐滿客人，非常好氣氛，旺過星期五晚老蘭好多架！

*假如繼續排開咁坐就變奇景喇！

巴黎就算唔shopping齋行幾日都行唔完，行街行到鬼咁攰，不如落船抖抖啦，休息之餘又可繼續觀光，幾寫意呢！遊船線路主要係沿住塞納河兩岸觀光，大多以鐵塔為起點，沿左右兩岸遊一圈，需時大約一個鐘左右，分兩種一種係沿途有景點介紹既觀光船，俾得起錢仲有飯食添，另一種係站站停但冇人講介既巴士船Batobus，以唔食飯計價錢都差唔多不過後者係day pass，好似抵D，事關可以逐個站觀光，再上番船，慳左腳骨力又慳埋車錢。唉，向巴黎坐地鐵真係好難頂架，冇冷氣人又多，無論春夏秋冬去都係咁辛苦，焗到暈低！

上一篇：情迷法蘭西 - 巴黎 Paris II

下一篇：情迷法蘭西 - 聖米歇爾山 Mont Saint Michel

情迷法蘭西 - 巴黎 Paris II

齋係巴黎一到已經夠講幾日，真係好多野睇，要歷史有歷史要現代有現代，文化有商業有美食精品，各式其式！
Notre Dame 巴黎聖母院
*如果唔係小說鐘樓駝俠咁出名，都唔識哩座巴黎聖母院啦！其實原著直頭叫做巴黎聖母院 - Notre-Dame de Paris，出自法國大文豪Victor Hugo。

Moulin Rouge 紅磨坊
*位於蒙馬特紅燈區既一座歷史尢久既夜總會，今日已經變成高檔消費場所喇！

Sacre Coeur 聖心教堂
*沿住紅燈區一路向山上走，就係雪白既聖心教堂，藍天白雲再襯青草地，令人心境變得寧靜平和。

Au Lapin Agile 狡兔之家
*哩間老餐廳其實冇乜特別，只係話說當年畢卡索未出名前，經常泥哩到以畫換餐，哩位老闆認真唔話得！

上一篇：情迷法蘭西 - 巴黎 Paris I

下一篇：情迷法蘭西 - 巴黎 Paris III

情迷法蘭西 - 巴黎 Paris I

等左成兩個月終於出發喇，機票、酒店、火車飛、資料搜集通通準備就緒，預算旅費上限HK$20,000全包。老實講向好多人心目中，仿佛法國就只有巴黎一個城市，好多人聽到我話打算去足12日法國，大家即時反應唔係話好浪漫，而係話我好浪費，認為十幾日既歐洲之旅，起碼都應該去番三幾個國家先叫做抵玩喎。當然各人有各人既想法，個人認為法國其實好大，好睇好玩好食既地方多的是，即使去完今次哩個十幾日既法國之旅返泥，我仍然會答你仲有好多地方未去，一定要再來！不過起碼隔多三幾年先啦！

第一站 巴黎 Paris

之前跟團泥過一次，已經係6-7年前既事喇，仲要係10日玩4國個種鴨仔團呢，所以都冇乜印象喇，仲記得參觀過羅浮宮、睇過名畫MonaLisa、去過聖母院、上過鐵塔睇日落、去過香榭麗舍大道食法國海鮮大餐(自費)、仲有行過老佛爺百貨，景象似遠還近。決定襯今次旅程將哩d零碎既片段從組，用相機同眼睛從新記錄清楚。經過幾輪修訂行程，最終大功告成，將想去想玩想睇想食既都一一編排好，簡直係史上最強itinerary！哈哈哈. . . 為左要去Mont Saint Michel，完訂巴黎既三日行程被濃縮成兩日，當然景點盡可能一個都不能少啦！不過最後仍然選擇放棄凡爾賽宮，決定留返向巴黎市內遊，繼續行下食下買下睇下，好彩法國6-7月日長夜短，晚晚十點先日落，如果唔係邊樹行得晒咁多地方呢，苦了兩條腿！

Arc de Triomphe 凱旋門
*哩個景點簡直就係巴黎地標啦，向正市地中，大門對正就係Champs Elysees大道，係必到景點，事關冇去過凱旋門即等如無去過法國一樣。

Opera Garnier 歌劇院(€8)
*巴黎歌劇院向正Shopping區，後面就係老佛爺百貨，一出地鐵站就係，非常方便，想入裡面但又唔想睇Show既話，都可以俾錢入場既，旋轉樓梯金碧輝煌，雖然唔可以行入去舞台參觀，但其中一個包廂係開放既，可以睇晒整個表演舞台。

Tour Eiffel 艾菲爾鐵塔
*鬼咁多人排隊等上塔呀！起碼要排成個鐘囉！都係算吧啦！每晚日落開始三小時每小時首10分鐘有Light show，但係都趕唔切睇，淨係離遠睇到少少咋！唉失敗！鐵塔前面既一幅草地叫做Champ de Mars 戰神廣場，除左野餐晒太陽吹水之外，最0岩就係擺各類pose影Kai相囉！哈哈. . .有幾Kai就要睇各位既創意喇！

Grand Palais 大皇宮
*沿塞納河上的一個玻璃皇宮，門口金碧輝煌，現作為文化藝術展覽場地，唔買飛就連門口都入唔去呀！

Petit Palais 小皇宮

*位於大皇宮對面，而家都係用左泥作展覽場地。

Musée du Orsay
*由火車站改建而成的藝術歷史珍品展覽館。

Musee du Louvre 羅浮宮
*未去過就梗係要去睇下既，就算唔識藝術都入去參觀下個皇宮啦，最少蒙羅麗莎都應該聽過掛！

Pont des Alexandre III 亞歷山大三世橋
*連接大皇宮同羅浮宮既一條橋，橋上石像雕塑金碧輝皇，夜攝最佳景點。

Musee de Orangerie 橘園博物館 (€9.5)
*哩個場我就一定要撐啦，事關我係印象派大師 Claude Monet既Fans泥架麻，想當年讀High School時都有模仿過佢畫既Lily架，仲被老師拎左去展覽添！今日有幸一賭真跡，好開心！哩到一共放左8幅睡蓮，幅幅都成20呎長，需然咁大幅但係任何一個角度作獨立欣賞都可以湊成一幅畫，認真唔簡單！

Place de la Concorde 協和廣場
*向羅浮宮公園對出既一座廣場，冇導遊講解，亦冇興趣想知，所以話唔到俾大家知點解會放左支埃及方尖碑向樹囉！

上一篇：情迷法蘭西 - 序

下一篇：情迷法蘭西 - 巴黎 Paris II

情迷法蘭西 - 序

期待多時既法國之旅終於出發喇！由頭到尾12天既行程，已經被我編排得密密麻麻，真係人都癲！去歐洲旅行真係好方便，差唔多所有既資料都可以從網上搵得到，再加上網友既報料，自由行真係好容易！今次旅程既主題係南法風情，從巴黎一直南下，路線如下：

Day 1 巴黎

Day 2 巴黎 -> Mont St michel

Day 3 Mont St michel -> 巴黎

Day 4 (上午) Avignon

(上午) Orange

Day 5 (上午) 花田半日遊 Gordes + Roussillion

(下午) Arles

Day 6 (上午) Avignon

(下午) Pont du Gard + les Baux + St Remy
Day 7 Marseille

Day 8 Nice

Day 9 (上午) Cannes

(下午) Grasse

Day 10 (上午) Monte Carlo

(下午) Eze

Day 11 巴黎

Day 12 抵香港

個幾月前見到中航有個超平機票，$2680來回巴黎 / 倫敦，連埋稅都係4千幾蚊，話晒都係6月尾7月頭既暑假檔次，真係平通街價喇！同期坐法航要6千幾埋單架！需要向北京轉機，所以要用多兩個鐘，基本航程跟法航差不多！

因為早籌備，所以酒店方面都幾易book，主要通過Venere酒店網幫手，仲唔使prepaid，只需要提供credit card擔保，24小時前cancel都唔罰款，好方便，唯一係Mont st Michel個晚最難搞，起碼要早一個月前訂，最後都係訂唔到島上既酒店，訂唔到只係因為嫌貴，最後訂左大馬路個邊既酒店，d網友話行20鐘就到，我地計過起碼行半個鐘頭囉！所以方便計最好都係訂番島上酒店啦！有時早訂都有d平房既！托賴今次搵既幾間酒店都好就腳，唔難搵又近景點！價錢都唔算貴喇，三床房平均30歐羅/人/晚，hostel瞓碌架床，都要25蚊晚喇，仲要同一大班人share厠所呢！

另外我地都買左France Railpass 3+2日埋單都要2千幾蚊，去完返泥有以下提議，如果只係去法國一到既話，買3日証就夠喇，因為發現除左tgv既車會查飛之外，所有ter都係唔使訂位，上到車又冇人查飛，即係話睇0岩班次憑証上車就ok，endup我地全程淨係查過3次飛，一次係巴黎->Mont St Michel，哩程來回一定要預早7日前訂位，如果首站就去既話，最好經香港agent或上網做好reservation，否則一定訂唔到理想班次，買左火車証訂tgv班車既位仲要俾留位費，唔同行程唔同收費，個半至三蚊歐羅不等，一定平過經香港agent訂，事關佢地收留位費又要出飛費，最好就係出發前上法國火車聯網 好晒班車時間，去到一次過訂，唔怕雞同鴨講又可以慳多一個幾毫咁囉！同埋訂左位唔上車又冇事既，不過唔訂位就一定上唔到車囉！同埋佢地係唔會check passport既，竟然發現有人用朋友用淨個張pass繼續用都一樣冇問題，真過份！早知我都問下有冇二手証啦！仲有就係巴黎交通網上資訊非常完善，一個網站就可以查均所有交通線路包含地鐵/巴士/電車，仲幫你搵埋最快轉車位添！買車飛最好就買一套十張，事關一次過買十張€11.6，逐張買要€1.6架！南法方面，由於地方細景點尚算集中，搭又唔係，索性慢慢行就好，車錢都慳埋。另外，發現google map好勁，連地面相片都有埋，如同親歷其景一樣！

飲食方便，法國大餐就梗係貴架啦，但係大餐唔使日日食既，早午餐可以選擇食老麥、三文治或者Kebab，都係平均€4-5一餐0者，另外夜晚想食好d既話，巴黎就貴D，起碼~€15一個Set / menu，Starter + Entre 或者 Entre + Desert，南法個邊物價平少少，€10就食到時令青口套餐喇，超味美！香港起碼貴double，感覺特別抵食！之前仲驚緊去餐廳食飯一定要order礦泉水飲，好在間間餐廳都有Tap Water提供，係呀，法國D水喉水就咁飲得架喇！不過向士多買支1.5L既Evian都係~€1.5 - 2，同向香港買屈臣士水既價錢差唔多啦！其次要一提既就係當地特產既水果，南法當做Melon、車厘子、士多啤梨、桃、橙都係又平又好食架！景點就仲簡單啦，個人認為除非你好有興趣睇博物館，唔係既話齋去羅浮宮+凡爾賽宮就夠晒喇，事關哩兩個景點已經夠你玩足一日，買張兩日pass就可以去多幾間囉！純粹入去參觀個埸地都ok既，好似Ossay museum/ grand / petit palais就算唔識欣賞裡面既展品，齋係睇個場都ok架！不過就唔使花太多時間喇，事關巴黎仲有大把好去處囉！個人認為第一次去起碼要用4日3夜先夠囉！南法個邊就easy好多，自駕遊當然係最好不過啦，但係唔識揸或者唔敢揸既話，坐火車/ 巴士甚至參加local tour都好方便，比如話要睇花田既就最好參加本地團喇，半/一日遊都係€40-70/人，保證一定睇到，唔使自己四圍搵呀麻！如果想去南法既小城鎮可以揀向Avignon落腳，再輻射式day trip，記住火車証係無限任坐local train架！車程大約15 - 30分鐘，超方便！再講南法既小鎮，唔係個個都值得玩足一日架，就算一日趕兩場都唔過份囉！反正法國夏天成10點先天黑，大把時間啦！如果26歲以下有國際學生證好多景點都有門票優惠，最緊要就係可以一次過幫埋同行既老友記買埋門票，咁就大家都有折扣優惠啦！當然前題係個樣唔可以過份老囉！被人揭發就樣衰啦！間題唔係在於你呃人，而係當眾俾人話：嘩！你咁既樣都仲想扮26歲以下呀！唔係掛！咁就真係肉酸死囉！哈哈哈

下一篇：情迷法蘭西 - 巴黎 Paris I